Институтот за европска политика објави документ „Извештајот на Прибе две години подоцна: нова Влада и нови можности за решавање на стари проблеми“, во поглед на Итните реформски приоритети, според кој, во судството, наместо деполитизација на назначувањето и кариерното унапредување на судиите, очигледна е политичка пристрасност.
Притисокот врз судиите се зголемува и преку контроверзното основање на Советот за утврдување на факти и покренување на постапка за утврдување одговорност за судија и покрај спротивното мислење на Венецијанската комисија и на реакциите на граѓанскиот сектор, стои во Извештајот.
Исто така, според Институтот за европска политика, Законот за одредување на видот и одмерување на висината на казната, во голема мерка се смета за уште едно ограничување на автономната независност на судството. Од Институтот за европска политика додаваат дека е неопходно и јакнење на улогата на Собранието во надзорот на независните органи и започнување на практика на собраниски расправи за претставниците на Судскиот совет и на Советот на јавни обвинители, со воспоставување механизам за обезбедување на транспарентност во назначувањето и унапредувањето на судиите.
Што се однесува до изборите, соред Институтот, Итните реформски приоритети се делумно исполнети, главно преку новиот состав на Државата изборна комисија и ревидирањето на Изборниот законик, што не значи дека начинот на работа на ДИК е сменет во пракса.
„Треба веднаш да започне јавна расправа за можните измени на Изборниот законик, со цел да се одбегне ситуација во која измените на Изборниот законик се донесуваат во кус период пред самите избори“, се вели во Извештајот.
Медиумите, јавната администрација и политиките за борба против корупција се дел од Извештајот, со препораки за иплементација на итните реформски преоритети.
