Претставници на синдикалната организација на вработените во Центарот за управување со кризи, се сретна со раководителот на Управувачкиот комитет, министерот за внатрешни работи Оливер Спасовски.
Покрај информациите за состојбите во ЦУК, во поглед на наводното неодговорно работење на директорот и одбивањето да излезе во пресрет на синдикалното барање за средба и дијалог за решавање на дел од проблемите во ЦУК во интерес и на сите вработени, министерот Спасовски со синдикалците разговарал и за стратешки работи, потребни да се обезбедат заштита и унапредување на професионалноста, на кариерата и стандардот на работата во ЦУК.
Синдикатот изрази желба и подготвеност за партнерство во делот на обезбедување, заштита и унапредување на професионалноста и условите за работа во ЦУК.
Но, Синдикатот на министерот му ги поставил истите прашања, на кои со години бараат одговор од директорот на ЦУК, а никогаш не добиле одговор: за трошењето пари на даночните обврзници, односно, дали е практика да се плаќа возач по договор на дело 18.000, а тој уште од 2014 да бил вработен во јавно претпријатие; дали може вработен со договор на дело (веројатно, и без безбедносен сертификат) да ја претставува Дирекцијата на состаноци на Групата за проценка и Управувачкиот комитет, како највисоки тела на Владата за управување со кризи; колку се поделени пари во вид на награди, на крај од 2016-та за нецелосен двомесечен ангажман на „свои заслужни луѓе“, ангажирани по договор на дело во ЦУК, со плата од по 38.000 денари…
