Мантии, елбасан тава, кифли, тавче гравче, пинџур, мусака од боранија, тебуле, трилече…, и многу други традиционални јадења ќе биддат дел од трпезата на манифестацијата „Турлитава – Заедно е послатко“, која по четврти пат ќе се одржи утре во Паркот на Франкофонијата, во Монтажната галерија, во Скопје, со почеток од 19,30 часот. Настанот е организиран за одбележување на 22 Јули, Ден посветен на жртвите на дела од омраза, како акција на Советот на Европа.
„Идејата со која се организира настанот е надминување на меѓусебното непознавање на различните етнички групи во нашата држава, како најчеста причина за создавање конфликтни ситуации, односно, за ситуации кои водат кон дела од омраза. Цениме дека со организирање пикник на кој ќе бидат претставени вкусни традиционални специјалитети, застапени во различните етнички кујни во Македонија (македонска, албанска, турска, ромска, српска, бошњачка…), во директна смисла ќе се посочи на различноста како можност за споделување. Тоа значи дека различните припадности (на етничка, национална, јазична, религиозна, сексуална и на други групи) можат да бидат застапени и можат да опстојуваат заедно и еднакво значајно“, соопштуваат од Хелсиншкиот комитет за човекови права, како организатор на настанот, со подршка од невладините организциии „Амбрела“ и „Легис“.
Оргнизаторите ги повикуваат граѓанките и граѓаните сите заедно да ги вкусат различните традиционални кујни, и заедно да го потенцираат прифаќањето, признавањето и споделувањето.
Д. М.
