Околу 130 илјади работници во Македонија, не ќе можат да добијат минимална плата од 12.000 денари, за септември, доколку до крајот на овој месец, Собранието не ги изгласа измените на Законот за минимална плата! Според Бранимир Јовановиќ, советник на министерот за финансии Драган Тевдовски, единствено од Собранието зависи кога ќе се имплементира оваа законска измена, која што има за цел да го подобри животот на граѓаните, кои досега примаа минимална плата од околу 9.000 денари.
„Законот се однесува на платите од септември, а на работниците им се исплаќаат во октомври, меѓутоа Законот е блокиран во Собранието речиси еден месец, поради тоа, не знаеме кога ќе биде донесен. Останува да видиме како ќе работи Собранието, дали воопшто ќе работи, наредниот период, дали овој Закон т.е. овие измени ќе се најдат на дневен ред, што ќе прават пратениците, можеби ќе имаа опструкции, како што имаше досега… Останува да видиме“, вели за ЦИВИЛ Медиа, Јовановиќ.
„Ќе бидат опфатени околу 130 илјади работници, што сега имаат плата под 12.000 денари. За да нема отпуштање на овие работници, предвидено е да има државна помош. Најголем дел од нив се вработени во текстилната индустрија и во трговијата. Висок процент од околу 40 отсто вработени во текстилната индустрија, кадешто работат околу 40.000 лица, значи 16.000, имаат плата под 12.000 денари. Во трговијата тој процент е помал, но измените се однесуваат на најзагрозените дејности, каде што работниците се најмалку заштитени“, додава Јовановиќ.
„Финансиската поддршка за фирмите ќе се исплаќа преку Министерството за труд и социјална политика, за да се спречи отпуштање на вработените. Во ребалансот за буџетот се предвидени пари за оваа намена, државата во првите шест месеци ќе покрива, околу 70 % од покачувањето на платата, а во наредните шест месеци, тој износ се преполовува. Во првата година ќе има државна поддршка. За да се добие поддршка, фирмите треба да кажат за кои вработени им е потребна поддршка …“, вели за ЦИВИЛ Медиа економскиот експерт Јовановиќ.
Моника Талеска
Камера: Атанас Петровски
Монтажа: Даниела Нисева
