Основното јавно обвинителство конечно ја почнало постапката по кривичната пријава поднесена од Хелсиншкиот комитет, против поранешниот министер Митко Чавков, раководни лица во Министерството за внатрешни работи и припадници на Единицата за брзо распоредување, кои дента на изборите за претседател на Студентскиот парламент на универзитетот „Кирил и Методиј“ (СПУКМ), минатата година, насилно упаднаа во просториите на Студентскиот парламент и ги исфрлија насобраните студенти.
Веста беше објавена во Фејсбук профилот на Ивана Туфегџиќ, пратеничка во Собранието на Република Македонија и поранешна членка на Студентскиот пленум.
Туфегџиќ даде телефонска изјава за ЦИВИЛ Медиа, во која истакна дека утрово ѝ пристигнала покана од ОЈО, да биде сведок во постапката, по повод кривична пријава која Хелсиншкиот комитет ја поднел против ексминистерот Митко Чавков и службени, униформирани полициски лица и раководители на Единицата за брзо распоредување, поради полициската интервенција на денот на студентските избори, во просториите на Студентскиот парламент.
„Ова кривична пријава е поднесена минатата година, меѓутоа, до денес немавме никаков одговор од ОЈО, во однос на овој настан. Со оглед на тоа дека сум повикана како сведок верувам дека е почната постапката во ОЈО“, истакна Туфекџиќ за ЦИВИЛ Медиа.
На социјалните мрежи беа објавени информации дека ОЈО како сведоци во постапката повикало и други учесници на настаните, членови на Студентскиот пленум.
Фари Хисени
