Генералното собрание на Обединетите нации ја усвои Универзалната декларација за човекови права во Париз, на 10 декември 1948 година. Декларацијата произлезе од мрачното искуство во Втората светска војна и потребата за заштита на основните права на човекот. Првиот член на Декларацијата „сите луѓе се раѓаат слободни и рамноправни во достоинството и правата“ ги гарантира правата и слободите на секој човек на оваа планета. Со самото раѓање, секој се стекнува со сите права опишани во Декларацијата.
На Меѓународниот ден на човековите права, ЦИВИЛ – Центар за слобода испраќа јасна и недвосмислена порака до институциите дека човековите права и слободи се нивна прва и последна обврска, а не интересите на политичките и финансиските моќници. На овој ден, како и секој друг ден во годината, повикуваме на акција и вклучување на сите граѓанки и граѓани во одбрана на човековите права и слободи во духот на солидарноста и почитувањето.
Граѓанките и граѓаните беа мета на дискриминација врз основа на политичка припадност, етничка и верска припадност, род, социјален или здравствен статус и сексуална ориентација долги години. Структурното насилство, селективната правда, дивеењето и грабежот на јавните пари, изборните кражби и монструозната злоупотреба на моќта беа дел од секојдневниот живот на граѓанките и граѓаните. Партијата на власт ја зароби државата и го згази човечкото достоинство. Слободата на говорот и медиумите беа речиси непостоечки. Тоа беше предолг период во кој ерозијата на системот и вредностите остави пустош зад себе. Сега е време кога сите институции, во духот на транспарентноста и отвореноста, а најмногу во духот на разбирањето за потребите на секој поединец, мораат максимално да ги почитуваат човековите права и слободи.
Граѓанките и граѓаните сѐ уште се соочуваат со дискриминација и кршење на основните човекови права и слободи практично насекаде – на работа, на улица и дома. Политиките на вработување, судството и полицијата, образованието, здравството и дистрибуцијата на социјалната помош се само почеток на долгата листа од сфери каде човековите права и слободи мора да се почитуваат во духот на Универзалната декларација за човековите права и Уставот на Република Македонија.
Неприфатливо е селективно почитување на човековите права и слободи. Неприфатливо е делумно почитување на колективни права само на некои заедници, на сметка на други заедници и категории на граѓанки и граѓани. Неприфатливо е почитување на човековите права на колективитети, а занемарување на правата на поединците.
Секојдневно, искрено, посветено и подеднакво за сите поединци и заедници! Веднаш!