Професорката Мирјана Најчевска сподели со јавноста преку својот Фејсбук профил, дека денеска упатила писмо до Советот за реформа на правосудниот сектор со кое поднесува оставка од членувањето во ова тело.
Почитувани членови на Советот за реформа на правосудниот сектор,
со ова официјално поднесувам оставка на членувањето во ова тело.
Изминатиот период јасно покажа дека ова тело е формирано само како параван за решенија кои се носат на друго место и служи за создавање лажна слика дека некаков екпертски тим има влијание врз реформските процеси во правосудството.
Фактички, ова тело нема достап до никакви информации, нема удел во ниту едно реформско решение, и, не учествува во анализите на законите кои се менуваат.
Јас како независен експерт и како универзитетски професор немам намера да служам за залажување на граѓаните и не дозволувам моето име да биде искористено во политичките промени кои се нарекуваат правни.
Ова е втора оставка од Советот за реформи во правосудниот сектор, по оставката на проф. Гордан Калајџиев во декември кој во таа прилика изјави: „Некои важни иницијативи се одбиваат без аргументација, така што Советот го доживувам повеќе како декор на Министерството и Владата отколку како вистински Совет за реформи.“
М. Л.
