Американскиот Стејт департмент објави обновенo предупредување до американските граѓани кои патуваат во странство. На интерактивната мапа на веб страницата на Стејт департментот, сите земји се поделени во четири категории. Нашите најблиски соседи како Косово и Босна и Херцеговина се ставени во втора категорија.
Во објаснувањето што го доби дописникот на МИА во Вашингтон, стои дека во земјите од втора категорија постои ризик од нарушена безбедносна ситуација и се препорачува особена внимателност и будност при патувањата во тие земји. Во предупредувањето за патување во Косово се советува особена внимателост поради зголемен ризик од можен тероризам.
– Во некои градови и села како Северна Митровица, Лепосавич, Зубин Поток и Звечан можни се граѓански немири, се вели во предупредувањето.
Понатаму, се истакнува дека терористички групи од Косово и Босна и Херцеговина подготвуваат можни напади во регионот на Балканот.
– Терористите можат да извршат напад без предупредување. Нивна цел се туристички локации, пазари и шопинг центри, локални владини установи, хотели, клубови, верски места, паркови или масовни спортски и културни настани, се вели во предупредувањето.
За Босна, покрај за тероризам, важи предупредувањето и за нагазни мини и се набројуваат истите точки каде терористите би можеле да извршат напади.
Најзагрозени се земјите од трета и четврта категорија и се препорачува преиспитување на патувањето и избегнување да се патува поради сериозен ризик во однос на безбедноста во овие земји. Русија, на пример, е ставена во трета категорија. Патувања во регионот на северен Кавказ, како во Чеченија и на планината Елбрус не се препорачани поради граѓански немири.
– Не патувајте на Крим поради странска окупација и злоупотреби од страна на окупантите, се вели во предупредувањето.
Заменик помошникот на државниот секретар, Мишел Берние-Тот, на специјален брифинг за новинарите во Стејт департментот денес укажа дека дел од земјите од четврта категорија се и Авганистан, Централна Африканска Република, Ирак, Иран, Либија, Мали, Северна Кореја, Сомалија, Јужен Судан, Сирија и Јемен.
Во предупредувањето се прецизира дека условите во сите овие земји можат да се променат ненадејнао и на американските граѓани им се препорачува воопшто да не патуваат таму.
Македонија, како и нашите соседи Албанија, Србијa, Бугарија и Грција се ставени во прва категорија на земји каде условите за патување се нормални и ризикот по безбедноста е низок.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
Одговорноста за редакциското опремување на текстовите (наслов, наднаслов, фотографија, тагови) е на ЦИВИЛ Медиа.
