Специјалната јавна обвинителка, Катица Јанева, на вчерашното гостување на 1ТВ, кажа дека Специјалното јавно обвинителство нема да бара притвор за Сашо Мијалков, кој е еден од обвинетите во случајот „Империја“.
Јанева кажа дека веќе има мерки за Мијалков, и дека тој ги почитува истите, како што ги почитувал и Никола Груевски, се појавувал на суд и според нив тоа е доволно.
„Сега веќе ќе се прават други проценки, но мислам дека за Сашо Мијалков нема да се бара притвор“, кажа Катица Јанева во вечерашното гостување на 1ТВ.
Таа додаде дека на суд ќе ги докажат бизнис релациите меѓу Орце Камчев и Сашо Мијалков, кој стои зад фирмата „Ексико“, колку пари се испрани преку неа и кој ги присвоил парите.
„Не е точно дека Орце Камчев нема бизнис релации со Сашо Мијалков, ќе се докаже на суд. Тоа се гледа и во разговорите. Нема директни телефонски разговори меѓу нив двајца бидејќи не биле таргет тие двајца, но имаме други разговори меѓу Камчев и негови блиски лица кои биле таргет“, рече Јанева.
Во однос на бегството на Никола Груевски во Будимпешта, на прашањето дали чувствуваат одговорност за тоа, бидејќи сепак претставува лош знак за државата во целина, Јанева одговори дека не треба да се префрла вината од едни на други и мисли дека тие во рамките на законот ги искористиле сите моменти и сите можности пред судот за да биде во притвор обвинетиот.
На Груевски сигурно ќе му се суди во отсуство, СЈО побарале поинтезивно судење на нивните предмети и дека судот се труди да закаже повеќе рочишта за нивните предмети.
„Мислам дека и ова нема да го поремети самиот тек на судење“, изјави Јанева.
„Специјалното јавно обвинителство (СЈО) побара притвор за Никола Груевски уште во февруари 2016 година кога некои други не можеа ни име да му споменат, а до минатиот четврток воопшто не одаваше некои настапи дека нема да се јави на суд за да најдеме причина плус зошто повторно би побарале да биде ставен во притвор“, изјави специјалната јавна обвинителка Катица Јанева.
А. П.
