ДРАГАН МИШЕВ
Последната изјава на Сиљановска Давкова кога – наместо претседателската, ја презема улогата на комичар, во обид да ги насмее присутните новинари – изобилува со недоследности, контроверзии, замена на тези, манипулации и лесно проверливи дезинформации.
Сегашната претседателка, во кампањата 2019 година за претседателските избори во објава на социјалните мрежи ги критикуваше плановите на тогашната влада предводена од СДСМ за набавка на нов авион, при што вели дека, ако таа биде избрана за претседател на државата, ќе се бори против ваков вид расфрлање на парите на граѓаните.
„Во план е набавка на нов и поголем авион за потребите на Владата и претседателот на Републиката. Во време кога здравствениот систем доживува колапс, службите на итната медицинска помош едвај функционираат со стари и нефункционални возила (чекајќи ја приватизацијата на секторот), државните функционери мислат само на својата удобност и безбедност, а тоа го оправдуваат со наводно зголемени потреби за патувања заради интеграцијата во НАТО и ЕУ. Ваквите потези сведочат за бескрупулозноста и себичноста на владејачката каста, која не работи за својот народ и не мисли на неговите секојдневни потреби.
Македонија, една од најсиромашните земји во Европа, сака да има ВИП авион кој ќе чини 20 милиони евра (плус одржување, пилоти, редовни тренинзи, и сл.) – и со тоа се легитимира како олигархија, во која управувачите ја злоупотребуваат моќта и државниот буџет за сопствени потреби.
Апелирам планот да се отфрли веднаш, а доколку станам претседател на Републиката, ќе одбијам вакви привилегии додека мојот народ нема за живот. Ако сакаме да се интегрираме во ЕУ, пример за европско однесување треба да дадат оние на власт, и да покажат скромност и почит и емпатија за оние кои живеат во сиромаштија“, апелираше тогаш кандидатка на ВМРО-ДПМНЕ и професорка на правниот факултет, Сиљановска-Давкова. која тогаш, во очигледен обид да се додвори на гласачите, небаре е доаѓа од некоја НВО, користејќи го вокабуларот од акцијата на ЦИВИЛ “Стоп за приволегиите“ од 2017 година, напича: СТОП ЗА ПРИВИЛЕГИИТЕ НАМОЌНИТЕ! И Правда и право за сите!
Сиљановска Давкова едно зборуваше кога беше во опозиција, но сега, откако е дел од власта, таа има дијаметрално спротивен став. Сега Гордана, од позиција на претседателка на државата, кандидирана од партијата ВМРО-ДПМНЕ која е на власт, стана апологет на барањата на владејачката партија за набавка на нов авион. Сега претседателката смета дека користењето на владин авион во дадени ситуации е поисплатливо од комерцијалните летови, и треба да се набави нов, зошто секогаш имала дилема кога летала со него бидејќи било стар, дури 25 години.
Дали претседателката, додека ја повторуваше парафразирано изјава на нејзиниот работодавач, премиерот Мицкоски, дека ќе се молел на Господ да не загине кога ќе лета со владиниот авион, за момент помисли дека припадниците на АРМ, чиј врховен командант е таа, летаат со хеликоптери стари над 40 години, и со нив изведуваат воени вежби и борбени мисии за одбрана на земјата? Или тоа не ја тангира (како ни шугата во АРМ), оти таа не лета со тие хелихоптери.
Заборави ли Сиљановска Давкова што кажала претходно? И дали таа заборавеност се должи на нејзините годините, во кои е сосема нормално да дојде до сенилност одн. деменција. Ако е така, тогаш е време, а и би било доблесно од нејзина страна, да ја напушти претседателската функција.
И наместо од нејзиниот кабинет, кој заедно со неа е меѓу најчестите корисници на на тој „прастар“ владин авион да ја потсетат дека погрешила, покажувајќи и го постот и видеото од таа изјава, напротив, постот е избришан. Но трагата остана. Некој се сетил па направил скриншот од истиот, кој останува да сведочи за превртливоста на претседателката.
Истовремено, и други делови од неумесната изјава на претседателката предизвикаа контроверзии во јавноста.
Прво, јавноста реагираше на какви разговори со колегите го троши времето претседателката, наместо со нив да дискутира за животниот стандард, висината на платите, достапноста до лекови, состојбата на болниците (болните од канцер и пишуваат отворени писма преку социјалните мрежи), за набрзо потоа да излезе информација дека е дискутабилно и тврдењето дека „авиончето на браќата Рајт“, како што го нарече претседателката, според неа старо 25 години ( според владиното соопштение, службениот авион е стар 20 години). не најстаро во регионот, откако се појавија тврдења дека, всушност, повеќе земји во регионот имаат постари владини авиони од нас имаат и Хрватскиот. чиј владин авион е постар – 27 години, словенечкиот владин авион е стар 23 години, произведен 2003 година; Црна Гора има владин авион „Лирџет 45“, постар модел од македонскиот, произведен во 1999 година. Албанскиот владин авион е произведен во февруари 2000 година, и е подарок од Турција. Босна и Херцеговина нема авион, но има ентитетот Република Српска, купен во 2019 година. Единствено српската влада има најмодерен авион во регионалната флота, купен во 2023 година,
И уште една неточна информација изнесе претседателката во изјавата, за која мислеше дека е смешна и ќе ги насмее и новинарите. Владиниот „Лирџет“ не е купен на старо, како што тврдеше, туку е нарачан од директно од фабрика во 2004 по трагичната авионска несреќа во која загина претседателот Борис Трајковски. Произведен е во 2004 година во САД, купен e во време на владата на Владо Бучковски и во сообраќај е од јануари 2005 година.
Претседателке, не само што не е смешно, трагично е.
Ако е и од Силјановска Давкова – премногу е!
Текстот е личен став на Авторот
ПРОЧИТАЈТЕ И:
Отворено писмо до претседателката: Ако ви дошло до смеење, дојдете со мене на онкологија
