Специјалното јавно обвинителство објави три нови истраги против 25 физички и 4 правни лица за кривични дела – злоупотреба на службена должност, измама и перење пари.
Во првата истрага „Попис“, која се води против поранешниот претседател на ВМРО-ДПМНЕ, Никола Груевски и претседателот на ДУИ, Али Ахмети, осомничени се за искористување на своите овластувања и воедно се договориле да го стопираат пописот на населението во октомври 2011 година.
„По договорот на осомничените со образложение дека по отпочнување на законот се појавиле недоследности во примената на одредбите од законот како недостаток на временски период за подготовка и обучување на лицата во спроведување на пописот, Владата до Собранието предложила да престане да важи Законот за попис на населението во Република Македонија во 2011 година, па посредно преку парламентарните групи на 15 октомври 2011 година бил изгласан Закон со кој престанува да важи операцијата на попис на населението.“ изјави специјалната обвинителка Фатиме Фетаи.
https://www.facebook.com/civil.mk/videos/1595891813862615/
Фетаи истакна дека потрошените парични средства за спроведување на пописот до моментот на одложувањето кои се искористени за дотогашните обуки, техничка опрема и материјали, немало да претставуваат штета и истите би биле искористени во одложената пописна организација, но одлучиле дотогаш потрошените парични средства да ги „фрлат во вода“ и на тој начин го оштетиле Буџетот на Македонија за 175.123.909 денари.
Втората истрага, под името „Моќник“, е поради основано сомнение дека под влијание на моќен пратеник се распродавал имотот на државата, и општински имот на негови блиски луѓе преку преземање на измамнички дејствија кон советници од една општина.
Пратеникот во тоа време го навел градоначалникот да го изманипулира Советот на општина Македонски Брод и на неговиот татко, за да му го продаде објектот во село Ижиште во кое била сместена општина Пласница. Исто ги изманипулирал советниците и им рекол дека му е даден на 30 годишна концесија на таткото на пратеникот и дека сака таму да отвори приватен бизнис.
Откако за тоа дознал градоначалникот на општина Пласница, Исмаил Јајовски, побарал од Владата да се испита таа ситуација и комисијата утврдила дека се направени многу пропусти при продажбата и дека општината продала имот што припаѓа на државата. Пратеникот потоа, за да му се одмазди на градоначалникот, му испраќал инспекции во неговата компанија, а на судијата кој го судел случајот го лустрирал и му било забрането да ја врши дејноста.
Третата истрага „Актор“ се отвора поради сомнение дека е сторено кривично дело во постапка за јавна набавка за избор на најповолен понудувач за градење на автопатот Демир Капија – Смоквица.
„Дополнително во оваа истрага се отвора поради сомнение за перење на пари, кои фирмата добитник на овој тендер ги добила со злоупотреба во постапката за јавната набавка.“
Покрај тоа во овој предмет има сомненија и за перење пари што се спроведувало преку четири компании кои на своите вработени им исплаќале огромни плати, по што во Неготино биле претворени во евра и биле давани на рака на Грците. На овој начин се испрани 31.865.811 евра во период од 2012 до 2016 година.
Ангела Петровска
