Специјалното јавно обвинителство го објави извештајот за активностите за гонење на кривичните дела поврзани и кои произлегуваат од содржината на незаконското следење на комуникациите, што се однесува на период од последните шест месеци, односно од 15 септември 2016, заклучно со денеска.
„Ова јавно обвинителство и во текот на извештајниот период остана конзистентно во намерата да обезбеди независно, непристрасно и професионално водење на истрагите по однос на кривичните дела поврзани и кои произлегуваат од содржината на незаконското следење на комуникациите. Како Јавен обвинител за гонење на кривичните дела поврзани и кои произлегуваат од содржината на незаконското следење на комуникациите, цврсто сум убедена дека на овој начин ќе успееме да обезбедиме почитување на начелото на еднаков третман на сите граѓани пред Уставот и законите“, вели специјалната обвинителка Катица Јанева во извештајот.
„Од структурата по кривични дела што е составен дел на Извештајот, може да се констатира дека најголемиот дел од кривичните дела за кои постои основано сомневање дека се сторени, се однесуваат на кривичното дело Злоупотреба на службената положба и овластување од член 353 од Кривичниот законик и тоа најголем дел – потешкиот облик на ова кривично дело на штета на буџетот на Република Македонија“, стои во извештајот.
„Во наведениот период, интензивно се работеше на отворените предистражни постапки, во чии рамки особено внимание беше посветено на истражувањето на одделни настани што произлегуваат од материјалите со кои располага ова Јавно обвинителство, а кои произлегуваат од содржината на незаконското следење на комуникациите. Напредокот постигнат во еден дел од отворените истражни постапки, очекувам дека во скоро време ќе резултираат со донесување на јавнообвинителски одлуки и поднесување на обвиненија“, велат од СЈО, осврнувајќи се на изминатите шест месеци.
Извештајот ги содржи и очекувањата на оваа институција за следниот период.
„Во наредниот шестмесечен период очекувам, пред сè, во целост да се нормализира соработката со институциите и органите во земјата, во рамки на законските овластувања, со цел да се овозможи непречена и ефикасна работа на Јавното обвинителство што е во интерес на правдата и на сите граѓани на Република Македонија. Иако во извештајниот период ова Јавно обвинителство продолжи да наидува на проблеми во остварување на соработка со правосудните и други институции, изразувам уверување дека во периодот што следи, оваа соработка ќе биде унапредена и сите тела државни органи и институции надлежни за спроведување закони, ќе обезбедат помош по барање на ова Јавно обвинителство, согласно со Законот за кривична постапка“, вели Јанева, посочувајќи ги пречките и притисоците со кои се соочува СЈО во континуитет.
Ова е трет шестмесечен извештај на Специјалното јавно обвинителство. СЈО треба Извештајот да го достави до Собранието на Република Македонија, што претставуваше досегашна пракса утврдена со закон, по што следуваа пратенички прашања на кои одговараше обвинителката Јанева.
Поради тоа што Собранието не функционира, СЈО Извештајот денеска го објави на својата официјална веб- страница.
