Бошњачкиот демократски сојуз поднесе жалба во Основното јавно обвинителство по отфрлената кривична пријава против вицепремиерот и министер за односи меѓу заедниците Иван Стоилковиќ, во врска со неговата изјава дека геноцидот во Сребреница е „некрофилски дизниленд“.
Како што посочи денеска директорот на БДС, Фарук Хасиќ, по 14 месеци Обвинителството ја отфрлило кривичната пријава поднесена од страна на БДС и Бошњачкиот национален совет, а делото било преквалификувано во „Ширење расистички и ксенофобичен материјал по пат на информатички систем“, со образложение дека тоа не се гони по службена должност. Според Хасиќ, изјавата на Стоилковиќ дека геноцидот во Сребреница е „некрофилски дизниленд“ не е политичко мислење, туку нечовечна и криминална навреда кон жртвите и нивните семејства.
– Стоилковиќ во контекст на донесувањето на резолуцијата за Сребреница во Обединетите нации јавно изјави дека геноцидот во Сребреница е „некрофилски дизниленд“. Тоа не е политичко мислење, тоа е болна нечовечна и криминална навреда кон жртвите и нивните семејства. Што направи Јавното обвинителство, 14 месеци молк, ниту еден одговор, ниту еден знак дека оваа пријава е разгледана сериозно и по тие 14 месеци, пријавата не само што беше отфрлена, туку делото беше непринципиелно преквалификано во „Ширење расистички и ксенофобичен материјал по пат на информатички систем“, со образложение дека тоа не се гони по службена должност. Срамно и понижувачки за правниот поредок на нашата држава, рече Хасиќ.
Според него, во обид да се оправда Стоилковиќ пред граѓаните, минатата година пречекал делегација од 11 наставници Бошњаци вработени во образовните институции и изјавил дека во неговата партија членувале и Бошњаци. Хасиќ го повика министерот со име и презиме јавно да ги наведе членовите на партијата.
– Стоилковиќ во обид да се спаси се правда дека станува збор за политички напад и дека по повод на Денот на Бошњаците минатата година пречекал делегација од 11 наставници Бошњаци кои се вработени во образовните институции на нашата држава. Дали треба да му аплаудираме за тоа што дошол на работа и ги извршил службените обврски? Напротив, тој ја злоупотребил нивната присутност за евтина политичка пропаганда. Понатаму, изјавува дека во неговата партија има Бошњаци. Го повикуваме јавно – со име и презиме да ги наведе тие луѓе. Ако навистина постојат. Ако не – нека престане да манипулира со идентитетите на цели заедници, рече Хасиќ.
