Наредниот период е исклучително значаен за спроведување на пообемни подготовки за интегрирање на нашите општини во административниот простор на Европската Унија. Имаме целосно разбирање за ставот општините да прифатат нови надлежности, но под услов да се оствари висок степен на автономија во нивното спроведување, смета вицепремиерот задолжен за економски прашања Фатмир Битиќи.
Како што потенцираше, за само една година имаат реализација на 80 отсто од започнатите проекти, а останатите ќе бидат реализирани во предвидениот временски период до крајот на 2023 година.
-Нашата визија е континуирано подобрување на функционалноста на општините од сите аспекти со долгорочна цел да се создадат силни единици на локална самоуправа, рече Битиќи во денешното обраќање во Скопје на годишната конференција за децентрализација и локално управување.
Тој верува дека само системски пристап носи одржливи решенија, а таков е, како што рече, и пристапот што го имаат во унапредување на системот на локалната смаоуправа.
-Посветени сме во овој процес како еден од важните реформски процеси кои се потребни за забрзан разој но и рамномерен и праведен развој кој ќе одговара на потребите на граѓаните. Во тек се неколку големи процеси кои е важно да се случуваат паралелно. Годинава, во јули, ги почнавме преговорите со ЕУ. Очекуваме преговорите да придонесат кон усогласување на системот на локална самоуправа со критериумите и стандардите на Европската Унија, додаде Битиќи.
Битиќи информираше дека во 2023 година треба целосно да се оцени системот на локална самоуправа и како што посочи, во контекст на европските интеграции, резултатите од спроведувањето на процесот на децентрализација, ќе продолжат да бидат оценувани како политички критериуми за членството.
-Во меѓувреме, кризите низ кои поминуваме јасно ја истакнуваат потребата од соработка на сите нивоа, како и подготвеност за спроведување на ефикасни мерки и посветеност за спроведување на енергетска транзиција, рече Битиќи.
Тој напомена дека фокусот на децентрализација на краток рок треба да биде ставен на зајакнување на општините, преку подобрување на рамката за финансирање и зголемување на нивните надлежности, овозможувајќи висок степен на автономија, а притоа да не биде на штета на граѓаните, туку во нивна полза, овозможувајќи исполнување на нивните основни права и несоздавајќи потешкотии во нивен секојдневен живот.
Битиќи исто така потсети дека во август беше донесен Законот за изменување и дополнување на Законот за финансирање на единиците на локална самоупраава, со кој е предвидено постепено зголемување на процентот на приходите од данокот на личен додход, од 3 на 6 отсто во период од 2022 до 2025 година.
