Првото место по загаденост на Скопје, ги натера граѓанките и граѓаните утре во 12 часот да се соберат пред Влада и да го „одбележат“ големото достигнување, за жал! На повикот на социјалните мрежи „Станете за чист воздух“ досега најавија присуство десетина илјади граѓан(к)и.
„Протестот не е организиран од политичка партија, организиран е од граѓани… Организиран е од тебе, од мене, од твоите деца, од вашите родители, од сите нас кои дишеме загаден воздух. Пожелно е да носите маски на протестот. Транспаренти секој со своја инспирација“, стои на повикот.
Граѓанската иницијатива „О2 Kоалиција за чист воздух“ заедно со граѓански здруженија и иницијативи, активисти од цела Македонија пред некој ден, поднесоа барање до Претседателот на Владата на Македонија, Зоран Заев, за редистрибуција на буџетските средства кон зголемена заштита на животната средина, намалување на загадувањето и запирање на рудниците, со обезбедување на средства не помалку од 2.5% за Заштита на животната средина од вкупните расходи за 2018 година.
„Ако барањата не бидат прифатени, ние како граѓани, ќе преземеме правни чекори и ќе поведеме постапки против Република Македонија за кршење на ратификуваните конвенции, Устав, човекови права и права на детето“, велат од О2 Коалицијата.
„Веќе се знае колку, каде, што и како е загадено. Доколку вие сте некој што има обврска да преземе некаков чекор, а тоа не го правите, вие учествуате во таканаречениот еко геноцид. Сметам дека проблемот со загадувањето во целата држава станува нешто што може да го наречеме елементрана непогода. Доколку во оваа состојба оној кој е најповикан не преземе ништо, нам не ни останува ништо повеќе, освен по вечерашната средба со Зоран Заев да преминеме кон последниот чекор, барање и тропање на меѓународните врати“, изјави Душко Груевски.
ЦИВИЛ – Центар за слобода дава целосна поддршка на граѓанските организации и активисти кои се борат за чист воздух и животна средина и во своето соопштение до јавноста ги повика Владата и Министерството за животна средина и просторно планирање сериозно да се зафатат со решавање на проблемите со животната средина.
Дехран Муратов