коментира: ЏАБИР ДЕРАЛА
Ајде еден позитивен коментар за добри, антикорупциски вести! Првата е дека Државната комисија за спречување на корупцијата (ДКСК) ја усвои Националната стратегија за спречување на корупцијата и судирот на интереси што во следните пет години треба да ја спроведат институциите, со цел да се обезбеди подигнување на довербата на граѓаните во системот. Втората е дека се разгледува опцијата за итно донесување на Стратегијата уште во овој состав на Собранието. Се разбира, овој коментар ќе се комплетира како позитивен, ако Собранието навистина и го стори тоа.
Навистина, Законот има и неколку фалинки, за кои пишувавме и допрва ќе пишуваме. Но, општо земено, борбата против корупцијата конечно зазеде добра насока.
Ако некогаш борбата против корупцијата ја предводеше институција под целосен диктат на режимот и служеше за криење на корупцијата на Фамилијата, сега имаме една поинаква ситуација. ДКСК под водство на Тантуровски беше институција што немаше ниеден предмет за корупција против режимот, но затоа беше иницијатор за хајка против невладините организации. Реформите донесоа сосема поинакво ДКСК, предводена од бескомпромисната Билјана Ивановска и нејзините колешки и колеги – професионални, искусни и решителни луѓе.
Законот за спречување на корупцијата и судирот на интереси беше пред една година (јануари, 2019). Постапката за донесување на антикорупцискиот закон ја следеше максимална транспарентност, невидена во минатото. Креирањето на законот и чекорите поврзани со реформи во Државната комисија за спречување на корупцијата беа спроведени со динамична интеракција меѓу релевантните владини институции (Министерство за правда, кабинетот на премиерот Заев и други) со јавноста и независните експерти и невладини организации, меѓу кои, со највидливо учество се издвојува токму ЦИВИЛ. ДКСК е пример за тоа дека во оваа земја, сепак, има и знаење и решителност.