Еврокомесарот за проширување Јоханес Хан, во вторник следната недела доаѓа во посета на Скопје. Се очекува, Хан да се сретне со лидерите на парламентарните политички партии, но сепак, изгледа неговата најважна задача ќе биде да изврши притисок врз претседателот Ѓорге Иванов, во кратката пауза на Иванов во Македонија, меѓу враќањето од од Азербејџан и заминувањето во Австралија.
Во разговорите со Иванов, се очекува Хан да го потврди уште еднаш својот став кој претходно го објави на социјалните мрежи.
„Во однос на последниот развој на настаните во Македонија, сите политички лидери, вклучително и претседателот Иванов, мора да го почитуваат исходот од неодамнешните избори. Во демократијата, мора да се признае парламентарното мнозинство, дури и ако тоа не го сакате. Затоа, очекувам сите политички лидери и институциите да му дозволат на демократскиот процес да се одвива по својот тек, во интерес на граѓаните“, порача Хан, преку соопштение на Твитер, откако Иванов одлучи да не му го додели мандатот на лидерот на СДСМ, Зоран Заев.
Хан денеска е во Сараево каде ќе одржи состанок со премиерите на земјите од Западен Балкан, меѓу кои и македонскиот премиер во заминување, Емил Димитриев.
За најновиот развој на ситуацијата во Македонија, загриженост изрази и известувачот за Македонија во Европскиот парламент, Иво Вајгл, кој најави дека во Стразбур ќе има работен состанок со европратениците задолжени за Македонија, Ричард Ховит и Едуард Кукан и со комесарот Јоханес Хан, за состојбите и за евентуалната помош за Македонија.
„Нашиот единствен мотив е цело време да бидеме објективни и корисни за македонската држава и македонскиот народ. Таа објективност ја задржав од првиот ден, не сум навивач ниту за едната ниту за другата опција. Но, се знае како се игра по правилата на демократијата, тој што е способен да има мнозинство во парламентот има право да формира влада. Тука нема друга варијанта“, според МИА, децидно изјавил Вајгл.
„Мислам дека почетокот на таа приказна е состанокот во Тирана, кој е непримерен. Тоа го реков кога премиер на соседна држава повика претставници на политички партии да се договараат за владина програма. Тој како чин вреди да се осуди, но тоа не е доволно голема причина за да не се создаде владата и да се продлабочуваат меѓуетничките конфликти. Тоа не е добро и штетно е за интересите на Македонија како држава“, изјавил Вајгл, според МИА.
