„Се согласуваме со ставовите на генералниот секретар на НАТО, Јенс Столтенберг, и на еврокомесарот за проширување и за добрососедство, Јоханес Хан, за формирањето влада. Сите партии треба да ги почитуваат демократските процеси и институции и да се фокусираат на нивната заедничка заложба – да се спроведат клучните реформи. Само на тој начин, Македонија ќе напреднува во своите стратешки цели за членство во НАТО и во Европската унија, нешто што САД одамна го поддржуваат. Тоа е во согласност со нашите претходни изјави и со изјавата на амбасадорот (Џес) Бејли дадена во интервјуто на ‘Сител’ на 18 февруари“, се вели во одговорот на амбасадата на САД, на прашањето на агенцијата Мета, за ставот на Амбасадата во однос на изјавите на генералниот секретар на НАТО, Јенс Столтенберг и на евроамбасадорот за проширување на Унијата, Јоханес Хан.
Столтенберг пренесувајќи го ставот на НАТО во однос на политичката криза во Македонија, изјави дека очекува да се додели мандатот за формирање влада и ги повика сите страни на воздржаност во изјавите и во дејствата.
„Декемвриските избори во 2016-та година беа забележани од страна на меѓународните набљудувачи како суштински чекор во решавање на кризата. Тие беа оценети дека се добро организирани и без поголеми инциденти. По еден обид да се формира влада, сега е објавено дека, во согласност со барањата утврдени од страна на претседателот, сега се собрани доволно потписи на пратениците“, истакна Столтенберг.
Претходно, и Хан сподели сличен став. Тој очекува дека очекува претседателот Ѓорге Иванов да го даде мандатот за формирање нова влада и додаде дека промените во демократските општества се природни и треба да бидат прифатени, кога се резултат на веродостојни избори.
„Прифаќање и почитување на изборните резултати и правото на лидерите да се обидат да формираат влада е знак на зрела демократија. За попречување и за поткопување на таквите напори, нема место во демократскиот процес. Оттука, очекуваме сите страни да ги почитуваат демократските принципи и стандарди, да се вклучат конструктивно за да се најде основа за заедничка работа и за соработка, наместо да се трага по можности за поткопување на едни со други. Таквите пристапи во минатото ја однесоа земјата во криза. Тие мора да се избегнуваат од сите страни, без разлика дали се во владата или се опозиција. И владата и опозицијата имаат улога и значење во функционирањето на демократија и ја формираат иднината на земјата“, изјави Хан.
Ставот на Хан, беше критикуван од пратеникот од редовите на ВМРО-ДПМНЕ, Илија Димовски, кој на својот Фејсбук профил, напиша: „Кога веќе решивте на претседателот на Република Македонија, избран од граѓаните, да му кажувате што да прави околу мандатот, добро е и да кажете што мислите за предлогот наместо 67, идната Влада да има поддршка од 100 пратеници, но без редефинирање на државата, без двојазичност на целата територија, без бинационалност, а со зачувување на унитарноста, името и на македонскиот идентитет? Велевте дека треба поширока поддршка на владата, еве ја. Ако еднаш го прекршивте ветувањето дека нема да се мешате, повелете и вторпат, одговорете“.
„Како што и претходно соопштивме, нема да шпекулираме за составот на владата и за нејзината програма. ЕУ едноставно очекува брзо формирање на нова влада, со широка политичка поддршка, која силно ќе се посвети на европските реформи и ќе ги имплементира сите делови од Договорот од Пржино, како и реформските приоритети“, се вели во реакцијата на Европската комисија, „одговор“ на повикот на Димовски.
М. Т.