Дури 27 кривични дела, од кои за 17 веќе постојат значителен број на докази и 10 кривични дела за кои постои сомнение дека се извршени, се дел од Посебениот извештај за идентификувани сторители и можни кривични дела сторени за време на насилствата во Собранието на 27 април, што денеска го објави Хелсиншкиот комитет за човекови права.
„Видно од многубројните видео снимки, полициските службеници задолжени за чување на јавниот ред и мир и безбедноста на присутните во собраниските сали, дозволија непречен влез на протестантите. Влезот им беше дозволен и на лица кои беа маскирани со качулки и кои со себе носеа тврди и остри предмети, наменети за загрозување на физичкиот интегритет на присутните во Собранието. Набрзо потоа, повредени беа десетина пратеници (од кои најмалку еден со тешки повреди), новинари, над 70 граѓани и над 20 полициски службеници“, се вели во Извештајот што се осврнува на настаните кои се случија по влезот на дел од демонстрантите од иницијативата „За заедничка Македонија“ во Собранието.
Извештајот се однесува на кривични дела идентификувани преку фотографии, аудио-видео материјали и сведоштва, како и на кривичните дела за кои постојат сомненија, но сè уште не е истражено дали биле сторени и од кого. Извештајот се осврнува и на повредите на права и слободи, гарантирани со Уставот и санкционирани со Кривичниот законик.
Можните сторители се поделени во четири групи: организатори, извршители, полициски службеници и нивни претпоставени. Кривичните дела произлегуваат од 8 поглавја од Кривичниот законик, а беа насочени против: животот и телото, слободите и правата на граѓаните, имотот, сигурноста, државата, службената должност, правосудството и јавниот ред.
Досега, Министерството за внатрешни работи во координација со Основното јавно обвинителство – Скопје, идентификуваше дваесетина сторители на кривични дела. Како што велат од Хелсиншкиот комитет, улогата на правосудните органи е да утврдат дали и кои од посочените кривични дела се сторени или имало обид за нивно сторување и да не дозволат погрешна квалификација, колективизирање на одговорноста и паушално санкционирање.
Во извештајот се наведени можните кривични дела според членови од Кривичниот законик.
М. Теговска
