Судот во Хаг ја потврди пресудата на граѓанскиот суд од 2014 година, според која Холандија е делумно одговорна за смртта на околу 300 босански муслимани од Сребреница, кои биле засолнети во базата на мировните сили на Обединетите нации. Судот заклучил дека Холандија постапила противправно, со тоа што ги избркала муслиманите од базата и дека мировниците требало да знаат дека постои реален ризик, тие да се соочат со нечовени постапки и ликвидација, ако бидат предадени на вооружените сили на босанските Срби.
„Судот изнајде дека холандската Влада дејствувала незаконски. Со дозволувањето на луѓето да го напуштат објектот необезбедени, тие немале шанси да преживеат и тие морале да знаат дека постои реален ризик од нехуман третман и егзекуција“, се наведува во одлуката на Судот во Хаг.
Холандската Влада и војниците истовремено не се сметаат за одговорни за другите две категории на жртви, односно, оние кои се наоѓале околу базата на Обединетите нации и оние кои тргнале во бегство и се упатиле кон околните шуми. Оние коишто биле во базата на мировниците, и според првостепената одлука требало да бидат евакуирани. Холандските власти поднесоа жалба на првичната пресуда, со тврдење дека не можеле да знаат дека муслиманите ќе бидат убиени. Самата одлука на Судот се смета за исклучок, со оглед на тоа што Обединетите нации имаат имунитет од кривично гонење.
Во меѓувреме, околу 200 холандски мировници најавија дека ќе ја тужат својата Влада, барајќи да им исплати отштета поради штетните последици кои ги претрпеле во овој случај. Адвокатот на војниците соопшти дека ќе се бара компензација од 22 илјади евра за секој од нив, со што вкупната сума би изнесувала околу 4,5 милиони евра. Актуелните власти признаваат дека батаљонот кој бил испратен во Босна за време на војната, бил без адекватна опрема и немал доволно информации од терен, поради што мисијата за заштита на мирот била нереална.
