Кандидатот на ДУИ, Висар Ганиу по трет пат го победи противкандидатот на Беса, Зеќирија Ибрахими и во наредните четири години ќе биде градоначалник на Општина Чаир. Од 719 регистрирани гласачи на Избирачкото место 2901, во ПОУ „Иднина“, вчера гласале 272 лица, од кои 169 гласале за Ганиу, 98 за Ибрахими, 5 гласачки ливчиња се неважечки.
Вчерашниот ден во Чаир помина релативно мирно, фер и демократски. Екипата на ЦИВИЛ, покрај тоа што имаше претставници во самото избирачко место, поголемиот дел беше стационирана во чајџилницата „Кај Бало“ („Te Bala“), која се наоѓа во маалото каде што се прегласуваше. Гостите во чајџилницата, на прв поглед, не се „замараа(т)“ и не разговараа(т) за политика, меѓутоа знаат сè што се случува, во однос на политичките манипулации, калкулации, договори… Со еден збор, чајџилницата е институција. Таму не постои пишан договор, таму важи дадениот збор.
Единствениот очигледен прекршок што го забележавме беше сообраќајниот, „блиската средба“ меѓу полициско комби и „голф 5“, што се случи на неколку метри од чајџилницата, односно, точно пред кафулето кое според чаирчани, важи за збирно место на активистите на ДУИ.
Пред и околу избирачкото место имаше зголемена полициска контрола и полицајците нѐ информираа дека имаат наредба, ако забележат партиски активисти како агитираат или се закануваат на граѓан(к)ите за кого да гласаат, веднаш да ги приведат.
Во дел од медиумите имаше информации дека активисти на ДУИ стоеле пред влезовите на зградите и им се заканувале и не им дозволувале на гласачите да излезат на гласање. Тимот на ЦИВИЛ не забележа такви нерегуларности.
Контактите на ЦИВИЛ беа на располагање на граѓан(к)ите да пријавуваат или да нè информираат за притисоци, закани, уцени…, меѓутоа никој не пријави дека пред влезовите на зградите стојат активисти на ДУИ.
Поголема група на активисти, од попладневните часови па сѐ до завршување на гласањето, беа собрани во и пред штабот на ДУИ, во близина на една џамија, на стотина метри од основното училиште „Иднина“.
Инаку, целата кампања беше пред сè црна, меѓутоа за кандидатот на ДУИ, Ганиу, не видовме црна дамка.
Дехран Муратов
