За да се продолжи традицијата на хуманост, да не се заборави еден од изворите на солидарност, покрената е иницијатива за враќање на пораката која беше поставена на урнатиот ѕид од Старата железничка станица – Да се врати пораката на Тито за солидарност по скопскиот земјотрес во 63та.
„Не познавам скопјани кои не сочувствуваат со катастрофата која му се случи на Скопје во јули 1963 година. Не познавам многу скопјани кои не ја прочитале пораката која беше поставена на срушениот ѕид од старата железничка станица, но познавам малку скопјани кои не ја разбрале пораката и се дрзнаа да избришат дел од животниот стил кој беше вплетен кај скопјани по една голема катастрофа“, пишува Александар Богоевски, на Фејсбук.
Тој истакнува дека пораката која стоеше на ѕидот од разрушената стара железничка станица беше ехо на светското справување со катастрофи кои може да се случат секому и секаде!
„Пораката е космополитско Скопје, за соживот и солидарност со сите на кои им се потребни во најтешките моменти. Солидараноста кон повредените, кон штетите и загубите кои ги претрпеа жителите на еден град, помошта која пристигна од сите страни на светот како код се вгради во менталитетот на жителите на Скопје – да се помогне, секому, без разлика на бојата на кожата, националноста и религиската припадност. Да се биде дел од светот, да се надминат припадноста и национализмот кога некому е потребна помош. Да се биде хуман!“, додава Богоевски.
„Во колективната меморија на граѓаните на град Скопје испишаната порака на Јосип Броз Тито дадена по земјотресот од 26 јули 1963 имаше важно место и представуваше репер во постоењето и негувањето на човечки релации во трагичните моменти на живеењето на еден град. Поттикнати од ехото на таа порака и потребата на нејзиното постоење за идните генерации, ние група граѓани покренуваме иницијатива за нејзино враќање на местото каде била, Старата железничка станица, а денешен Музеј на град Скопје“, напиша Даница Павловска, архитектка и поборник против проектот „Скопје 2014“.
Градот кој се издигна по катастрофата ја носеше оваа порака во новите градби, градби кои ги проектираа и ги донираа жителите од 30 различни држави, градби кои беа светски архитектонски достигнувања во седумдесетите години.
Д.Муратов
