Русија се подготвува за максимална ескалација на војната во блиска иднина, главните борби допрва следуваат, смета секретарот на Советот за национална безбедност и одбрана на Украина, Олексеј Данилов.
„Русија се подготвува за максимална ескалација. Собира сè што е можно, вежба и тренира… Можам да кажам дека не исклучуваме никакво сценарио во следните две до три недели“, изјави Данилов во интервју за Sky News .
Тој не ја исклучи можноста рускиот претседател Путин да се обиде со уште еден напад од север, југ и исток, како што се случи на 24 февруари 2022 година – можеби дури и да се совпадне со годишнината.
Во исто време, секретарот на НСДЦ рече дека војската на Украина се подготвува за сите можности и овојпат има значително поголема поддршка од западните партнери, како што е Велика Британија, отколку пред една година.
Тој очекува околу половина од повеќе од 320.000 војници мобилизирани од Русија минатиот септември да бидат вклучени во вториот бран кога и да дојде.
Данилов истакна дека главните борби допрва следуваат.
„Поминавме низ голем тежок период, но свесен сум дека главните борби допрва доаѓаат и тие ќе се случат оваа година, во рок од два до три месеци. Овие ќе бидат дефинирачки месеци во војната“, нагласи тој.
Затоа Украина бара од своите западни партнери да испратат повеќе смртоносно оружје и побрзо. Во последните денови Киев инсистираше Западот да испрати борбени авиони.
„Би било одлично ако тие беа авиони [RAF] Typhoon. Ф-16 се исто така добри. Секоја помош би била добра“, рече секретарот на НСДЦ.
Украина се обидува да добие модерни ловци – Ф-16 или Ф-15 на американските воздухопловни сили или нивните европски аналози германски Торнадо или шведски Грипен – за да ги заменат нејзините авиони од советската ера.
Подготви: Д. Мишев
