Во саботата, на 09.08.2025 година, македонските медиуми објавија вест дека И.Т.(52) од Република Бугарија, исчезнал при нуркање во водите на Охридското езеро, над селото Трпејца, по што, како што забележува мониторингот на ЦИВИЛ, на страниците на порталите на социјалните мрежи следеше лавина од непримерен говор на омразата, дегутантни коментари и радување на туѓа несреќа, овој пат на исчезнувањето на нуркач од Бугарија во езерските води.
Дома имаат море а не знаат да нуркаaт, ех што ти прави карма; Охридско езеро гробница за Бугарите; На што дрога бил татаров;тој Албанија е ојден роба носел можда; Барал нокои докази дека таму некогаш живееле Турко монголи, па еве нашол; Еден го*нар помалку; А, јас мислев дека бугарите се со празни глави и не пропаѓаат во вода; Изгледа водата го има однесено во албанија, да бара бугар; Пасоши делит на албански човеци, , се дел од непримерниот говор на омраза на дел од корисниците на социјалните мрежи во земјава, канцерогеното ткиво кое го разорува нормалниот живот кај нас, но и во регионот.
Еден од оваа, за среќа не толку голема, но прилично гласна и нахална толпа, паднал во толкав занес што освен што го пишува коментарот со CAPS LOCK, дури и заборавил да употреби интерпункциски знаци: И СЕГА ШТО НЕМА ДА ЗАСПИЈАМ АКО НЕ БАРАЛ НЕШТО ДРУГО БЛГАРОТ НЕ Е НИШТО НОВО СО ТАТАРИТИТЕ ОХРИДСКИ ПД БОРИС ТРЕТИ ОД ВМРОНСКОТАТАРСКИТЕ КРИМОСИ СМРДЕНИ.
Злонамерните коментари не останаа незабележани ниту во соседна Бугарија. Новинарот и аналитичар Владимир Владимиров, кој често пати во своите коментари на социјалните мрежи се обраќа на македонски јазик, во објава на Фејсбук ќе напише:
За жал, вчера во Охридското Езеро се удави еден Бугарин кој нуркаше таму… Под вестите во разни медиуми во Северна Македонија има масовни ужасни и цинични коментари, „шеги“ и радост од трагедијата!?!?
Никогаш во животот не сум видел таква нечовечност и простотија!!!-пишува Владимиров во објавата.
П.С. Само пред неколку месеци, Бугарија беше првата што побара помош по пожарот во Кочани и го прифативме и 16-от најтежок случај! Илјадници Бугари донираа крв и пари за лекувањето и сите 16 пациенти се излекувани, живи и здрави дома!!!- додава Владимиров.
Мала утеха во целиов случај е што сепак е поголема групата на коментари кои го осудија ваквиот непримерен и дегутантен говор на омраза на своите сограѓани.
ЦИВИЛ – Центар за слобода најостро го осудува секој облик на поттикнување национална нетрпеливост и изразува крајна загриженост и згрозеност од дегутантниот и нечовечки говорот на омразата на веста за трагедијата на бугарскиот нуркач во Охридското езеро.
Драган Мишев
