Џабир Дерала, претставник на ЦИВИЛ, на панел – дискусијата „Кој ги тркала Ромите“, во организација на ЦИВИЛ – Центар за слобода, истакна дека проблемите со кои се соочува ромската заедница во Македонија се навистина тревожни и дека траат со децении.
„Човековите права се најважната категорија која нас не прави всушност луѓе. Тоа што може да се додаде на таа листа е всушност една долгогодишна, негувана дискриминација, омраза и насилство кон ромската заедница. Непријатно е кога гледаме дека етнички заедници, кои се малцинство во едно општество, кои на сопствена кожа и свој грб почувствувале како е да се биде дискриминиран по каква било основа, да бидат носители на дискриминаторски постапки, па и политики и практики кога се во позиција.“ изјави Дерала.
Дерала додаде дека утврден е фактот дека многу малку или речиси ништо не е направено со тие огромни средства кои се одвоени за подобрување на состојбата на човековите права на ромската заедница во Македонија.
„Тоа што ние го гледаме во изминатата деценија, во текот на таа декада на Ромите, како што ја нарекуваа агенциите на ОН, едноставно таа помош не допре до огромен број на корисници, оние на кои навистина им требаше таа помош, и сметам дека тоа е проблем и одговорност не само на донаторите, туку и во една крајно корумпирана политичка клика, која себеси си се претставува како политички претставници на Ромите.“ рече Дерала.
Според Дерала, со работата која ја врши ЦИВИЛ како организација за човекови права, многу често го гледаме злоупотребувањето на ромската заедница во изборни контексти. Изборите најостро ја отсликуваат политичката и општествената позиција на Ромите во Македонија.
„Нивниот глас се купува со насилство, со корупција, со поткуп кој чини ни помалку ни повеќе од 500 денари. Со 500 денари се купува волјата на еден човек, а потоа се фрла на буништето до следните избори. Ние видовме за 10 години повеќе изборни процеси, од кои повеќето беа предвремени, односно во крајно турбулентни услови спроведени, каде што Ромите беа навистина на крајно неприфатлив начин злоупотребени. Тоа мораме да го сопреме, со жестоки и решителни мерки кои треба да ги спроведат институциите во земјата, а не со декларации и ветување, и со поставување привремени планови.“ изјави Дерала.
Ангела Петровска
камера: Атанас Петровски
монтажа: Биљана Јордановска
