Државната изборна комисија испрати соопштение, според кое, Избирачкиот список што го објавиле на нивната веб-страна се заснива на податоците кои ги добиле од службените евиденции на Министерството за внатрешни работи, Управата за водење на матични книги и основните судови за државјаните на Република Македонија кои ги исполнуваат условите за избирачко право.
Од ДИК се децидни дека секој граѓанин има право да поднесе барање до нив, да не биде објавена неговата адреса од безбедносни причини. Барањата граѓаните може да ги поднесат на spadresi@sec.mk, или, до подрачните одделенија и канцеларии на ДИК.
„Граѓаните, доколку при увидот утврдат дека некој граѓанин не е запишан во Избирачкиот список или утврдат дека треба да се изврши запишување, дополнување или бришење на податоци од Избирачкиот список, имаат право, согласно член 48 став 2 од Изборниот законик, да поднесат барање со кое треба да приложат соодветна документација. Државната изборна комисија во рок од 3 дена од приемот на барањето ќе ја провери точноста на податоците и приложените документи и ако утврди дека барањето е основано, ќе донесе решение за запишување, дополнување или бришење на податоци, во смисла на член 48 став 4 од Изборниот законик“, соопштуваат од ДИК.
Од ДИК велат дека граѓанската контрола на Избирачкиот список е од суштинско значење и дека тоа ќе им помогне при ажурирање на податоците. Оттаму додаваат дека граѓан(к)ите имаат право да ги пријавуват сомнителните случаи и да поднесат барања за запишување, дополнување и бришење на податоци од Избирачкиот список, со приложување на соодветна документација.
