Кој кого оштетил, кој кого ограбил и кој како ќе ја оправи државата се дневните препукувања на политичките партии.
Со иста реторика и со исти обвинувања СДСМ да не заборави ВМРО-ДПМНЕ што правеше за време на нивното владеење, а ВМРО-ДПМНЕ да покаже дека било па поминало и додека не се вратат на власт СДСМ е криво за економијата, образованието, продажба на името…
Мицкоски „забранетиот говор“ го најавува за ден/два, најверојатно да го дополни со уште сочни детали за криминалите на СДСМ, Владата и кршење на слободата на говор во Собранието.
Образложението на Мицкоски е не е битно кој е домаќин во Собранието, и дека ова е јасен одговор какво помирување нуди премиерот. Понатаму тој јасно дава до знаење дека Договорот од Преспа е мртов и власта да се помири со тоа.
Правно –политичкото мртвило на Договорот е всушност став на граѓаните, па оттаму и став на опозицијата.
Граѓаните – еднакво –партија- еднакво- волја за власт.
Или кој губи има право да се лути.
СДСМ од својот прес центар соопштува дека и Мицкоски и ВМРО-ДПМНЕ се разочарување, но не мора да бидат и пратениците. Доволно е само да ги следат државните интереси. Државен интерес број еден во моментот е Македонија да биде дел од ЕУ и НАТО. А за тоа треба двотретинско мнозинство и поддршка од опозицијата за Договорот од Преспа.
„Сега секој пратеник од ВМРО-ДПМНЕ има шанса со поддршка на процесот во Собранието, на дело да покаже дека навистина е за членство во ЕУ и НАТО… Доколку раководството на ВМРО-ДПМНЕ и Христијан Мицкоски продолжат со своето деструктивно однесување и по секоја цена ја блокираат иднината, тогаш следуваат предвремени парламентарни избори веднаш на кои граѓаните ќе одлучуваат за својата иднина. На тие избори, граѓаните ќе гласаат за ЕУ и НАТО и ќе биде обезбедено потребното двотретинско мнозинство“, се вели во соопштението на СДСМ.
ВМРО смета дека ваквото однесување на власта е израз на страв, од никој друг туку Христијан Мицкоски. И така исплашена, таа власт во рацете на Зоран Заев, мора да сфати дека е готово. Граѓаните во дискурсот на ВМРО се одлучиле за поинаква Македонија од тие, граѓаните на СДСМ.
„Заев треба да ги остави партиските интереси на страна и да го слушне гласот на народот. Заев не треба да бара виновници за неуспешниот референдум во никој друг освен во себе самиот“, соопштуваат од ВМРО-ДПМНЕ.
Останатите политички партии во зависност со кого се во коалиција влечат или кон едните или кон другите, секогаш во, за и граѓаните.
Затоа што граѓаните знаат. ВМРО-ДПМНЕ смета дека знаат за криминалите на СДСМ и обратно, СДСМ смета дека граѓаните знаат за криминалите и деструктивноста на ВМРО –ДПМНЕ. Останатите партии тежат да ги убедат граѓаните дека и нивниот збор има вредност.
А тука се и граѓаните од дијаспората, кои носталгично ја бранат Македонија од внатрешните предавници, СДСМ сите приврзаници. Како граѓани што искусиле демократија во белиот свет децидно велат: „Повикот на Премиерот за помирување е закана за демократијата“.
За појаснување, се работи за истите граѓани, државјани на Република Македонија што оставиле на народните избраници да ја кројат судбината на државата. Во нивно име.
Б. Јордановска