До сега се потврдени 24 говорнички и говорници на Конференцијата за изборни реформи: Перспективи на македонските избори, но бројот на пријави за дискусија расте постојано, информираат од Тимот за комуникации на ЦИВИЛ. Конференцијата ќе ја отворат Претседателот на Република Северна Македонија, Стево Пендаровски и Амбасадорот на Сојузна Република Германија, Томас Герберих.
Конференцијата ќе се одржи во Скопје, хотел Континентал (Кристална сала), на 25 септември со почеток во 12 часот. На конференцијата се поканети лидерите на политичките партии без оглед на тоа дали се работи за голема или мала политичка партија, дали е застапена во сегашниот состав на Собранието или е вонпарламентарна. Воедно, ЦИВИЛ покани релевантни експерти и претставници на граѓанското општество и меѓународната заедница.
Меѓу говорниците се лидери на политичките партии, вклучувајќи го и лидерот на СДСМ, Зоран Заев, но и лидери и високи претставници на Алијанса за Албанците, Алтернатива, Беса, ДОМ, НСДП, Либерална партија, ГДУ, Демократи и други. Сѐ уште нема ни позитивен ни негативен одговор за учество на претставник од ВМРО-ДПМНЕ и ДУИ.
Меѓу говорниците се и Александар Кржаловски, МЦМС, Дарко Алексов, МОСТ, Владо Бучковски, Неда Малеска Сачмароска и многу други.
На Конференцијата ќе се говори за потребата од реформи во изборниот систем во целост, а поконкретно ќе се отворат темите за Изборниот законик, изборниот модел, Избирачкиот список, политичкото финансирање и медиумите и изборите. Учесничките и учесниците на Конференцијата ќе се обидат да дадат одговори на прашањата дали, како и во кој временски рок се возможни реформи во изборниот систем.
Првата верзија на Агендата, како и прелиминарната листа на говорници ќе биде објавена утре, на 18 септември. Присуството е возможно преку пополнување апликација или врз основа на директна покана од ЦИВИЛ.
Конференцијата е дел од проектот „Слободни граѓанки и граѓани за слободно општество“, финансиран од Министерството за надворешни работи на Сојузна Република Германија.
ЦИВИЛ Тим за комуникации
Aпликација за учество