Федерален судија го блокираше распоредувањето на Националната гарда на Калифорнија во Лос Анџелес од страна на администрацијата на Трамп и го нарече потегот нелегален, објави Би-би-си.
Наредбата на судијата за враќање на контролата врз трупите на гувернерот на Калифорнија, Гевин Њусом, нема да стапи на сила веднаш и администрацијата поднесе жалба.
Државата го тужеше претседателот Доналд Трамп во понеделник поради неговата наредба за распоредување на трупите без согласност на гувернерот Њусом.
Трамп рече дека ги испраќа трупите – кои обично се под надлежност на гувернерот – за да го спречи Лос Анџелес да „изгори“ во протестите против неговото ограничување на имиграцијата. Локалните власти тврдат дека ја имаат ситуацијата во свои раце и не им се потребни трупи.
Окружниот судија на САД, Чарлс Брејер, рече дека прашањето преентирано во барањето на Калифорнија е дали Трамп го почитува законот утврден од Конгресот за распоредување на Националната гарда на државата.
„Тој не го стори тоа“, напиша судијата во својата одлука. „Неговите постапки беа нелегални… Затоа, тој мора веднаш да ја врати контролата врз Националната гарда на Калифорнија на гувернерот на државата Калифорнија.“
Но, судијата ја одложи наредбата до петок попладне за да ѝ даде време на администрацијата на Трамп да поднесе жалба против неа. Администрацијата го стори тоа речиси веднаш по издавањето на наредбата.
Њусом објави на социјалните медиуми во четврток попладне дека „судот штотуку потврди она што сите го знаеме – војската припаѓа на бојното поле, а не на нашите градски улици“.
Администрацијата на Трамп соопшти дека ја презела Националната гарда на Калифорнија за да воспостави ред и да ги заштити агентите на Службата за имиграција и царина (ICE) додека тие апсеа луѓе во Лос Анџелес за кои се веруваше дека се нелегално во земјата.
И покрај приговорите на Њусом, Трамп нареди вкупно 4.000 војници на Националната гарда и 700 маринци да помогнат во смирувањето на немирите. Некои од трупите на Гардата сега се овластени да приведуваат луѓе доколку полицијата не може да ги уапси.
Претседател последен пат ја распоредил Националната гарда без согласност на гувернер пред повеќе од 50 години – за време на ерата на граѓанските права. Почесто е гувернерот да активира трупи за справување со природни катастрофи и други вонредни состојби, а потоа да побара федерална помош.
Пред преполната судница во четврток, адвокат од Министерството за правда му рече на судијата Брејер дека Њусом не требало да биде консултиран кога Трамп ја издал својата наредба.
„Гувернерот Њусом бил целосно свесен за оваа наредба… тој се спротивставил на неа“, рече адвокатот Брет Шумате. „Постои еден врховен командант на вооружените сили на САД“.
„Не“, одговори судијата Брејер, помладиот брат на поранешниот судија на Врховниот суд, Стивен Брејер.
„Претседателот не е врховен командант на Националната гарда“, рече тој, но додаде дека имало моменти и ситуации кога претседателот можел да стане началник на трупите.
Брејер, кој носел светло сина вратоврска, се повикал на Уставот повеќе пати за време на расправата, држејќи копија од документот во еден момент.
„Зборуваме за тоа претседателот да ги извршува своите овластувања. А претседателот, се разбира, е ограничен во своите овластувања“, рече тој. „Тоа е разликата помеѓу уставна влада и кралот Џорџ“.
Администрацијата на Трамп користеше закон што му дозволува на претседателот да ја повика Националната гарда во федерална служба кога се случува „бунт“.
Но, Калифорнија во својата тужба изјави дека протестите што траеја речиси една недела во Лос Анџелес – и вклучуваа повеќе од 300 апсења и затворање на голем автопат – не се искачија на тоа ниво.
„Во ниту еден момент во последните три дена немаше бунт или востание. Ниту пак овие протести се искачија на ниво на протести или немири што Лос Анџелес и другите големи градови ги видоа во минатото, вклучително и во последните години“, се вели во тужбата.
Пред неколку часа пресудата против Трамп е паузирана. Федерален апелационен суд ја паузираше пресудата со која се бараше од претседателот Доналд Трамп да ја врати контролата врз членовите на Националната гарда на Калифорнија во државата.
Претходната пресуда утврди дека Трамп незаконски ја федерализирал Гардата, што предизвика итна жалба од администрацијата.
Калифорниската Национална гарда ќе остане под федерална контрола откако апелациониот суд доцна во четврток ја паузираше пресудата со која му се наредува на американскиот претседател Доналд Трамп да ја врати контролата врз силите на гувернерот Гевин Њусом.
9-тиот окружен апелационен суд на САД соопшти дека ја става на чекање пресудата, донесена претходно во четврток од високиот окружен судија на САД, Чарлс Брејер, „додека чека понатамошна наредба“. Апелациониот суд закажа рочиште за предметот за вторник.
Д. Мишев
