На вчерашната средба во Владата на Република Северна Македонија помеѓу премиерот Христијан Мицкоски и министерот за локална самоуправа Златко Перински, од една страна и градоначалничката на Скопје, Данела Арсовска, која на функцијата дојде поддржана токму од партијата на премиерот и министерот за локална самоуправа, ВМРО – ДПМНЕ, заврши без конкретен резултат.
Премиерот Мицкоски ѝ даде рок на Арсовска да почне да си ја работи работата, откако скопските градоначалници едногласно побараа Владата да му ги одземе на Градот јавните претпријатија „Комунална хигиена“ и „Паркови и зеленило“, а министерот Златко Перински, кого предходно скопската градоначалничка го разреши од функцијата директор на Јавното претпријатие „Водовод и канализација“ поради, како што стоеше во соопштението, самоволие и несоодветно постапување во постапка за милионски тендер за пречистителната станица во Скопје, нешто што подоцна ќе стане познато како аферата „Рачиња во медот“, сега ги повика надлежните институции да преземат мерки и активности за да се утврди зошто градоначалникот на Град Скопје не постапува согласно со своите надлежности и со тоа го загрозува животот и безбедноста на скопјани, додека Арсовска најави прес-конференција за денеска во 11 часот, на која ќе го каже нејзиниот став.
На една фотографија од вчерашната средба која ја објави Владата, се гледа дека на разговорите помеѓу владините и претставниците на градот Скопје, присуствува и претседателот на Советот на Град Скопје, Трајко Славески, но тој, наместо од страната на градот, седи од страната на Владата.
Се поставува прашањето:
Во кое својство е таму присутен претседателот на Советот а градот, Трајко Славески? и
Дали со ова сака да се изземе од проблемите со кои се соочува градот? И од медот?
Драган Мишев
