СВЕДОШТВО Гласавме „за подобар живот“, за сега да преживуваме од депонија!

„Гласавме за ВМРО-ДПМНЕ и за Никола Груевски, бидејќи ни беше ветено дека ќе имаме подобар живот, вработувања и покачување на социјалната помош, но наместо тоа, тие ни ја укинаа социјалната помош, бидејќи собираме шишиња за да преживееме“, со солзи во очите вели за ЦИВИЛ Медиа една жителка од пробиштипската населба Драч, која што ја затекнавме како собира отпадок со нејзиното повеќечлено семејство во депонијата која е одалечена два километра од Пробиштип.

Друга соговорничка за ЦИВИЛ Медиа вели дека гласала за Груевски бидејќи бил на власт!

„Кога отидов кај нашиот градоначалникот Тони Тоневски, за кого и гласавме, да го прашам што документи треба да извадам за да добијам парична помош за трето дете, тој не ме ни прими. Кога седнал на таа своја красна фотелја, не ме ни познава“, вели граѓанката која се чувствува изреволтирана и изманипулирана .

Целото семејство, вклучувајќи ги и малолетните деца, секој ден пешки доаѓаат од Драч до депонијата во Пробиштип, за да собираат пластични шишиња кои потоа ги продаваат во најблискиот отпад.

„Три дена собираме шишиња, за да може да земеме околу 600 денари, за да имаме колку за леб, колку да преживееме… Политичарите те сакаат само кога треба да гласаш за нив, откако ќе седнат на столче не те е….. веќе“, резигинирано вели еден од соговорниците.

Горан Наумовски

Камера: Дехран Муратов

Монтажа: Ермин Климента

Репортажата/сведоштвата се дел од проектот Општество без граници, што ЦИВИЛ – Центар за слобода го спроведува со поддршка од германската Фондација „Хајнрих Бел“. Целта на проектот е промовирање и едукација на граѓанките и граѓаните на Македонија за Граѓанската повелба, глобален документ за унапредување на граѓанските права и на активното учество на граѓаните во процесите на одлучување