По веста која ја пренесе ТВ 24 Вести, дека вработена во Општина Пробиштип го пријавила градоначалникот Тони Тоневски за обид за силување, ЦИВИЛ Медиа се обиде да стапи во контакт со градоначалникот, како и со полициската станица во Пробиштип, со потпаролот на СВР Штип, и со штипското Јавно обвинителство, меѓутоа, никој од нив не даде никаков конкретен одговор!
Според ТВ 24 Вести, случајот е пријавен на 12-ти јануари, а ден подоцна, вработената во Општината дала исказ во пробиштипската полиција.
Од полициската станица во Пробиштип на прашањето на ЦИВИЛ Медиа кусо одговорија дека од нас „прв пат слушаат за вакво нешто“. И потпаролката на СВР Штип, во кусиот разговор изјави дека сé уште нема никаква информација,
И од Општина Пробиштип добивме одговор дека „денес нема никој кој би можел да даде изјава, вклучително и градоначалникот“.
Градоначалникот Тоневски на својот Фејсбук профил вчера објави демант на веста.
„Згрозен сум од прилогот на Телевизија 24 Вести за наводен обид за силување на вработена во Општината. Во целост ги демантирам сите искажани наводи во прилогот на споменатиот медиум. Тврдам дека не постои никаква пријава за обид за силување бидејќи такво нешто воопшто се нема случено. Ова е само обид за нарушување на мојот личен и политички углед, но се надевам дека во текот на утрешниот ден со официјалните информации од надлежните служби сето ова ќе биде расчистено“, напиша Тоневски.
Откако градоначалникот ги демантираше обвинувањата на социјалните мрежи и во дел од медиумите, уследи лавина коментари за поддршка на градоначалникот од неговите поддржувачи.
Меѓу ваквите коментари, вниманието на граѓанска новинарка од Пробиштип, соработничка на ЦИВИЛ која сака да остане анонимна, го привлекол Фејсбук постот на ученик-средношколец, кој му изразува целосна поддршка на градоначалникот Тонески, во име на Средношколска унија во неговото училиште во Пробиштип!?
„Го читам, го препрочитувам и не можам да им поверувам на сопствените очи. Дали нешто не е во ред со мене? Зарем светот дотолку стана извитоперен, што во политички игри се мешаат и ученици? Зарем и децата ќе ги користиме како партиско оружје, и од нив ќе правиме партиски поданици уште од најмали нозе?“, ни пишува граѓанската новинарка.
