Завршуваат последните подготовки за спроведување на референдумот во Гевгелија закажан за 23 април (недела). Денеска, Општинската изборна комисија спроведува задолжителна еднодневна едукација за членовите и замениците на избирачките одбори. Едукацијата се спроведува во форма на семинар на кој се опфатени теоретските и практичните сегменти за успешно спроведување на референдумот.
Како што информираат од Општинската изборна комисија на референдумот ќе гласаат повеќе од 19.000 жители на Општина Гевгелија, на 37 избирачки места.
Референдумот се спроведува по иницијатива на Советот на Општина Гевгелија, и за ова прашање сите советници, независно од партиската припадност, беа едногласни. Референдумското прашање гласи: „Дали во Општина Гевгелија треба да се дозволи отворање рудници?“
Здружението „Спас за нас“ со трибини, дебати, средби со граѓани, но и преку активности на социјалните мрежи, во изминатиов период ја води кампањата против отворање на рудници во општината.
Од здружението во разговор за ЦИВИЛ Медиа велат: „Штетата е катастрофална, неспоредливо поголема од користа, не може да се стави на вага… Овој тип на рудници подразбира уништување на природата! Кожуф е една од најбогатите планини со букова шума и некој сега решава дека треба да се уништат 3.900 хектари и да се наруши целиот биодиверзитет. Само ова е немерлива штета. Понатаму, за овој тип на рудници уништувањето се прави со експлозив што е многу едноставна постапка и затоа им се исплаќа, и покрај ниските концентрации од злато кои според официјални податоци се два грама во еден тон. Во следна фаза, земјата се третира со цијанид кој има својство од рудата да го извади златото и бакарот. Во процесот се испушта 10 до 15 тони висококанцерогена прашина која содржи арсен, талиум, сулфурни оксиди… Тоа значи, од првиот ден ќе дишеме таков воздух, што воздухот во Скопје ќе биде перфектна еколошка оаза. Прашината, покрај негативните ефекти врз луѓето, ќе го контаминира и високо квалитетното земјоделско земјиште во Гевгелискиот регион“.
Екипа на ЦИВИЛ – Центар за слобода во недела ќе биде присутна во Гевгелија додека се спроведува референдумот.
Валандово, по примерот на Гевгелија е втората општина од Југоисточниот регион која бара своите граѓан(к)и на референдум да се изјаснат за отворањето на рудникот во Казандол. За разлика од Гевгелија, валандовчани не очекуваат да наидат на поддршка од локалната самоуправа, затоа што, според нив, општинските власти сметаат дека рудникот треба да се отвори.
Градоначалникот на Валандово изјави дека наредната недела ќе има јавна седница на Советот на Општината, на која ќе присуствуваат и експерти од областа на животната средина и сите засегнати страни ќе имаат можност да се изнесат аргументите за и против рудникот.
М. Теговска
