Висок функционер на Хамас изјави за Би-Би-Си дека палестинската вооружена група ќе го отфрли најновиот предлог на САД за нов договор за прекин на огнот во Газа и ослободување на заложниците.
Белата куќа во четврток соопшти дека Израел го „потпишал“ планот на американскиот претставник Стив Виткоф и дека чека официјален одговор од Хамас.
Израелските медиуми цитираа израелски претставници кои велат дека Хамас ќе предаде 10 живи заложници и телата на 18 мртви заложници во две фази во замена за 60-дневен прекин на огнот и ослободување на палестинските затвореници во израелските затвори.
Функционерот на Хамас рече дека предлогот не ги задоволува основните барања, вклучително и крај на војната, и дека ќе одговори навреме.
Израелската влада не коментираше, но премиерот Бенјамин Нетанјаху наводно им кажал на семејствата на заложниците во четврток дека го прифаќа планот на Виткоф.
Израел воведе целосна блокада на Газа и ја продолжи својата воена офанзива против Хамас на 18 март по пропаѓањето на двомесечниот прекин на огнот постигнат со посредство на САД, Катар и Египет.
Се наведува дека сака да изврши притисок врз Хамас да ги ослободи 58-те заложници што сè уште ги држи, од кои се верува дека најмалку 20 се живи.
На 19 мај, израелската војска започна проширена офанзива за која Нетанјаху рече дека трупите ќе „ја преземат контролата врз сите области“ на Газа. Следниот ден, тој рече дека Израел, исто така, ќе ја олесни блокадата и ќе дозволи „основна“ количина храна во Газа за да се спречи глад.
Скоро 4.000 луѓе се убиени во Газа во текот на изминатите 10 недели, според Министерството за здравство на територијата, управувано од Хамас.
ОН вели дека уште 600.000 луѓе повторно се раселени поради израелските копнени операции и наредбите за евакуација, а извештајот на IPC поддржан од ОН предупредува дека околу 500.000 луѓе се соочуваат со катастрофални нивоа на глад во наредните месеци.
Д. Мишев
