МАРИЈА ТОДОРОВСКА
Ни Македонија не беше поштедена од агресивната царинска политика на американскиот претседател. Царината за Македонија изнесува 33 отсто.
Доколку споредиме со другите земји од Западен Балкан, најголеми царини има за Србија (37%) и БиХ (35%). А, најмали царини САД воведе за Албанија, Косово и Црна Гора (10%).
Како ќе влијае ова врз нашата економија, вчера подготвивме кратко интервју со уредникот и економски новинар Мирче Јовановски.
Македонија индиректно ќе биде повеќе „погодена“ од овие 33 отсто царини. Тоа се должи на тоа што многу е поголем извозот во европските земји отколку извозот во САД.
Извозот во САД во 2024 бил вреден 118,2 милиони американски долари.
Индиректно најмногу ќе се почуствуваат овие царини во автомобилската услуга, додека директно ќе бидат засегнати т.н аутсоринг услуги кои македонските фирми ги нудат на американскиот пазар. Па оттука последиците се јасни, губење работни места и намален извоз.
Веќе на почетокот на оваа година добро познатата компанија „Џонсон Мети“, која е најголем извозник на автомобилскиот пазар, го намали бројот на работни позиции. А фирмата „Аптив“, која што ги снабдува со делови германскиот автомобиски гигант „Фолксваген“, ги затвори своите погони.
Во однос на извозот на македонски производи на американскиот пазар, според податоци од ДЗС, во 2024 година најмногу се извезувале машини и транспортни уреди (67%), храна и живи животни (13, 5 %) и пијалаци и тутун (11 %).
За македонските фирми постои и можноста да се пререгистрираат во земјите со помал процент на царини, во Албанија, Косово или пак Црна Гора. Оваа теза е возможна, ни одговори во интервјуто Јовановски, доколку фирмите добро „го маскираат“ потеклото на своите производи.
Вчера Владата испрати и соопштение во кое вели дека нема место за паника, дека веќе се предвидени овие царини и дека имаат план за понатаму.
Но, се уште нема никаква информација дали ќе биде нешто преземено.
Преземено од Нова.тв.
