ДРАГАН МИШЕВ
во соработка со Мониторинг тимот на Цивил
Мониторигн тимот на Цивил, при константното следење на делувањето на странската малициозна пропаганда во земјава, врз основа на целокупната анализа на делувањето на оваа пропаганда, односно на нејзинита најистакнати „чинители“, може да констатира дека најомилен политичар кој спроведува антизападна кампања, после рускиот диктатор Владимир Путин, кај дел од македонските медиуми, е претседателот на соседна Србија, Александар Вучиќ.
Иако Путин е се уште неприкосновен владетел на македонскиот интернет простор, барем кога се работи за медиумите кај кои евроатлантската определба на државата не е во прв план, сепак, српскиот претседател зафаќа голем дел од колачот со кој се насладува евроскептичниот, анти НАТО и останатиот ретрограден дел од македонското општество.
Мудрите мисли и ригидни ставови на Вучиќ во однос на Западот, НАТО, Русија, Кина Косово се помеѓу најраспространетите објави кај овие медиуми, без разлика на тоа дали неговите поимања за тековните движења во светската политика не кореспондираат со правецот по кој се движи нашата држава.
Така е пренесена и последната изјава на Вучиќ, со која тој, како „значаен фактор“ во меѓународната политика самоуверено одлучува дека: Тајван е Кина, и точка.
За овие македонски медиуми нема место за приговор на неговата изјава. Таа, иако е во целосна спротивност со ставот на западните парнери, а со самото тоа и на Македонија, како членка на Алијансата, истата се пренесува некритички, без приговор, онака како што е сервирана од страна на дописникот на државната информативната агенција МИА од Белград, а всушност е само превод од српските медиуми.
И додека за тамошните економско-воено-опшествени текови, ваквата изјава има своја употребна вредност во остварување на државните цели на Србија, нејасна е потребата ваквата изјава на Вучиќ, дадена за кинески медиум во пресрет на посетата на кинескиот претседател на Србија, да биде интегрално пренесена во македонските медиуми.
Ова особено ако се има предвид дека Северна Македонија, како членка на НАТО и аспирант за почеток на преговорите за полноправно членство во ЕУ, треба да биде особено внимателна во однос на делувањето на кинеската пропаганда која веќе е во отворена хибридна војна против Западот и притоа го ангажира секој аспект од своите интеракции со надворешниот свет со цел да го поткопа, порази и замени Западот како модел на демократско општество и за таа цел ги користи сите ранливости што може да ги најде или создаде во либералните западни општества. Нејзините тактики вклучуваат принудна дипломатија, прокси војна преку непријателски држави, политичка шпионажа и операции за влијание, дезинформации и пропаганда, кражба на податоци, сајбер напади и повеќе во остварувањето на нејзините цели. На овие делувања не е имуна ниту Северна Македонија, посебно ако тие веќе делуват во непосредното соседство.
Но, ова и не е прв пат македонските медиуми некритички, без осуда ги пренесуваат манипулациите на Вучиќ, кога тој повеќе пати досега се замешал во внатрешните работи на Северна Македонија, преку постапки и изјави на штета на македонските национални чувства и меѓуетничките односи во земјава.
