Израелската војска тврди дека го убила шефот за логистика на Хезболах Сухаил Хусеин Хусеини во Бејрут.
Како што пренесува МИА, во соопштението се наведува дека Хусеини, кој раководел со логистиката на Хезболах и финансирањето на неговите различни единици, бил убиен во вчерашниот воздушен напад врз либанскиот главен град.
Израелската војска соопшти дека Хусеини бил и член на Советот за џихад на Хезболах, највисокото воено тело на милитантната организација, јави „Тајмс оф Израел“.
– Хусеини одигра клучна улога во трансферот на оружје меѓу Иран и Хезболах и беше одговорен за дистрибуција на модерно оружје меѓу единиците на Хезболах, надгледувајќи го и транспортот и дистрибуцијата на ова оружје, се вели во соопштението.
Хезболах се уште не ги коментира овие тврдења на израелската армија, пренесува Ал Џезира.
Хезболах ја ракетираше израелската воена разузнавачка база Глилот, во близина на Тел Авив
Либанското милутантно движење Хезболах доцна синоќа соопшти дека истрелало „бараж ракети“ врз главната израелска воена разузнавачка база во близина на Тел Авив.
Хезболах го посвети овој напад на својот лидер Хасан Насрала, кој беше убиен во израелски напад на крајот на септември.
Во соопштението оваа проиранска формација наведе дека „испукала салва од ракети кон базата Глилот“.
Во оваа воена разузнавачка база, според израелските медиуми, е сместено и седиштето на Мосад, израелската надворешна разузнавачка служба.
Проиранското исламистичко движење Хезболах претходно објави дека оваа база ја гаѓале и во август и октомври.
Тел Авив е одалечен 580 километри од либанската граница.
Сирени за тревога синоќа се огласија во централниот дел на Израел откако неколку проектили биле лансирани од правец на Либан, а израелската војска соопшти дека некои од проектилите биле пресретнати, додека други паднале во отворени области.
Израел во текот на ноќта ги гаѓаше јужните предградија на Бејрут
Израел во текот на ноќта гаѓал јужни предградија на Бејрут, откако израелската армија издаде предупредување до жителите на областа, јавија либанските државни медиуми.
Израел вчера изврши бран воздушни напади врз јужен Либан, при што 100 авиони гаѓаа околу 120 локации во период од еден час, соопшти израелската војска (ИДФ).
Арапскиот портпарол на ИДФ издаде итно предупредување до либанските цивили да избегнуваат да бидат на плажа или во чамци на бреговите на реката Авали на југот на земјата до понатамошно известување.
М. Д.
.
