Илјадници луѓе одржаа протести низ Мексико за да ги истакнат бројните присилни исчезнувања во земјата и да побараат повеќе мерки од страна на службените лица за нивно справување, пренесува Би-би-си.
Роднини и пријатели на исчезнати лица, како и активисти за човекови права, маршираа низ улиците на Мексико Сити, Гвадалахара, Кордоба и други градови, барајќи правда и ја повикаа владата на претседателката Клаудија Шајнбаум да помогне во пронаоѓањето на нивните исчезнати најблиски.
Повеќе од 130.000 луѓе се пријавени како исчезнати во Мексико. Речиси сите исчезнувања се случиле од 2007 година, кога тогашниот претседател Фелипе Калдерон ја започна својата „војна против дрогата“.
Во многу случаи, исчезнатите биле насилно регрутирани во нарко-картелите – или убиени затоа што се спротивставувале.
Додека нарко-картелите и групите на организиран криминал се главните сторители, безбедносните сили се исто така обвинети за смртни случаи и исчезнувања.
Во Мексико Сити, маршот го запре сообраќајот во главниот град, бидејќи протестот се движеше по главната сообраќајница.
Многу погодени семејства формирале тимови за пребарување, познати како „бускадори“, кои ги пребаруваат селата и пустините на северно Мексико, по дојави, честопати од самите картели, за локацијата на масовните гробници.
Букадорите ги извршуваат пребарувањата и својот активизам со голем личен ризик. По неодамнешното откривање во државата Халиско на очигледен нарко-ранч од страна на група за пребарување, неколку од вклучените бускадори исчезнаа.
Канцеларијата на државниот обвинител подоцна заклучи дека нема докази за крематориум на местото.
Обединетите нации го нарекоа ова „човечка трагедија од огромни размери“.
Мексико доживува ниво на исчезнувања што ги надминува некои од најлошите бројки во Латинска Америка.
Околу 40.000 исчезнаа во 36-годишната граѓанска војна во Гватемала, која заврши во 1996 година. Се проценува дека 30.000 исчезнале во Аргентина под нејзина воена власт помеѓу 1976 и 1983 година.
Широката распространетост на градови, држави и општини каде што се одржаа демонстрации го илустрираше степенот до кој проблемот со присилните исчезнувања влијае на заедниците и семејствата низ Мексико.
Од едниот до другиот крај на земјата – од јужните држави како Оахака до северните како Сонора и Дуранго – илјадници активисти и членови на семејствата на исчезнатите лица излегоа носејќи транспаренти со слики на нивните роднини, за да побараат од властите да сторат повеќе за решавање на проблемот.
Д. Мишев
