Министерството за култура испрати одговор до сите македонски автори одбиени на Годишниот конкурс за финансирање проекти од национален интерес во културата од областа на издавачката дејност. Особено е интересно што сите автори го добиле истото образложение за одбивањето?!
„СЕ ОДБИВА, бидејќи проектот не е аргументиран и елабориран соодветно и стручната Комисија не може да го оцени проектот од аспект на промовирање и афирмирирање на особени достигнувања и вредности во културата, согласно со наведените параметри во пријавата која е составен дел од Годишниот конкурс за финансирање проекти од национален интерес во културата од областа на издавачката дејност за 2017 година“, стои во одговор од Министерството, што важи за сите одбиени македонски автори.
За ваквиот одговор на Министерството за култура, ЦИВИЛ Медиа разговараше со Ненад Стевовиќ од издавачката куќа ИЛИ – ИЛИ.
„Добивме образложение за сите одбиени автори. Фактички, одбиени се сите домашни автори со кои што конкуриравме. Се работи за еднообразен одговор за сите, дека во нашата апликација не е добро образложено зошто тие дела се од национален интерес, па според тоа, нивната стручна комисија не можела да донесе одлука“, вели Стевовиќ во разговор за ЦИВИЛ Медиа.
Тој смета дека ваквиот одговор е навистина смешен.
„Излегува дека ние од ИЛИ – ИЛИ, еве првпат оваа година, не сме способни да направиме апликација со добри образложенија за ниту еден наш автор, а се работи за потврдени автори, со нивните претходни дела кои освоиле награди ‘Роман на годината’, или биле финалисти за таа награда, или пак, освоиле некои други награди. Не знам начин да најдам разбирање за да ги оправдам овие нивни одлуки“, вели Стевовиќ.
Иако во одговорот стои дека кандидатите имаат право на жалба во рок од 15 дена, Стевовиќ вели дека немаат намера да се жалат.
„Ние решивме да не поднесуваме жалба, бидејќи се работи за една толку очевидна и тенденциозна одлука против нашата издавачка куќа, а со тоа и против авторите со кои што конкуриравме. Сметам дека со жалбата само би дале легитимитет на една толку тенденциозна, цинична и вулгарна работа во однос на ИЛИ – ИЛИ“, завршува Стевовиќ.
„Семејството на ИЛИ – ИЛИ не се само Ненад Стевовиќ и Игор Анѓелков, тука се и сите наши соработници, нашите автори, тука се и нашите читатели. Големо е тоа семејство. Не ни можете ништо!“, стои во соопштението објавено на Фејсбук страната на издавачката куќа.
Под ова соопштение се јави и уште еден одбиен издавач што го добил истиот одговор од Министерството.
Маја Ивановска
Камера: Дехран Муратов
Монтажа: Ермин Климента
