Косово како таргет на руската пропаганда е уште од 90-тите години, смета Астрит Истрефи, извршен директор на тинк-тенк организацијата Балкан Форум, нагласувајќи дека Република Косово и Албанците од Косово историски биле важна цел на руската пропаганда.
Според него, Русија не само што се противи на независноста на Република Косово, туку користи пропаганда за манипулирање со јавното мислење и создавање негативна слика за Албанците на Косово.
„Русија, преку кампањи за дезинформација, постојано се обидуваше да ја искриви вистината за праведната борба за слобода на косовските Албанци, дури и во 90-тите години кога Србија вршеше етничко чистење на Косово и кога доказите за злосторствата, масакрите и геноцидот на Србија беа осудени од целиот демократски свет. Руската пропаганда отиде дотаму што интервенцијата на НАТО ја прикажува како неправедна. Исто така, Русија има за цел да ја ослабне социјалната кохезија, институциите и државноста на Косово и да ги попречи аспирациите на народот на Косово за интеграција во евроатлантските структури“, изјави Истрефи.
