Во специјалниот суд во Хаг за судењето на поранешните водачи на УЧК „Тачи и другите“, последните три дена сведочеше и поранешниот помошник државен секретар на САД, Џејмс Рубин, кој денеска го заврши своето сведочење.
Неговото сведочење беше внимателно следено од косовските медиуми, поради изјавите дека Хашим Тачи не бил во политичката егзекутива на УЧК, односно врвен командант, туку примал наредби од некој друг, како и дека нема информации што ги поврзуваат Тачи или другиот обвинет, Јакуп Красниќи, со обвинувањата за убиство, пишуваат косовските медиуми.
Во Албанија, новиот предлог-закон „За родова еднаквост“, претставен како чекор кон усогласување со европските стандарди, всушност е обвинет дека е отворена врата за воведување на концептот на трет пол и спроведување на ЛГБТ агендата во земјата, пишуваат албанските медиуми.
КОСОВО
Газета експрес: Не е во нормални рамки обвинетите да се држат во притвор повеќе од 5 години, вели Џејмс Рубин за случајот Тачи и другите
Поранешниот помошник државен секретар на САД, Џејмс Рубин сведочеше во поддршка на Хашим Тачи три дена по ред. Пред судечкиот совет, Рубин ја изрази својата загриженост за судењето во Хаг, пишува Газета експрес.
Рубин го започна своето сведочење на 15 септември, велејќи дека Хашим Тачи имал првенствено политичка улога и немал овластување за воени одлуки во рамките на ОВК. Според него, тој морал да добие одобрение од своите команданти за каква било важна воена одлука.
Тој рече дека нема информации што ги поврзуваат Тачи или другиот обвинет, Јакуп Красниќи, со обвинувањата за убиство.
Рубин рече дека американскиот посредник во Рамбује, Кристофер Хил, се обидел да го наруши неговиот имиџ и имиџот на државната секретарка Медлен Олбрајт. Според него, Хил бил „за ЛДК и против ОВК“.
Тој беше прашан и за улогата на Адем Демачи во рамките на ОВК. Рубин рече дека влијанието на Демачи, кој се спротивставил на договорот од Рамбује, било идеолошко, а не извршно, и дека ангажманите на Соединетите Американски Држави биле она што на крајот му овозможило на Хашим Тачи да го надмине својот отпор.
На вториот ден од сведочењето, Рубин рече дека првичниот впечаток на САД за ОВК бил дека е терористичка организација, но тој впечаток се променил откако се согласиле со договорот од Рамбује.
Рубин беше критичен кон Специјалниот суд, нарекувајќи го неправедно држењето на четворицата обвинети, за кои Рубин рече дека се предале доброволно, во затвор пет години.
Рубин, исто така, сведочеше дека немало ефикасна команда и контрола во ОВК и дека САД го сметале Тачи за лидер назначен од самите Албанци.
Во меѓувреме, на третиот и последен ден, Рубин даде некои појаснувања во врска со своите изјави пред Судот. Тој објасни дека не знае дали Тачи би го користел името „предавник“ доколку го прифател договорот, но рече дека ова можеби било повеќе негова перцепција.
Тој, исто така, рече дека соопштенијата издадени од ОВК биле повеќе обид да се направи ОВК поважна отколку што е.
Рубин нагласи дека не мисли дека Тачи бил врвен командант на ОВК, пренесе Газета експрес.
Ора инфо: Задолжителната воена служба во Србија го враќа стравот во Прешевската долина – Камбери бара истрага за смртта на 135 албански војници во текот на 1980-тите
Пратеникот од Прешевската долина во српскиот парламент, Шаип Камбери, изрази загриженост во врска со подготовките што се прават во Србија во врска со евентуалното враќање на задолжителната воена служба. Според него, оваа иницијатива влева страв кај Албанците во Долината поради историските трауми поврзани со дискриминација и нееднаков третман за време на воената служба во минатото.
Преку реакција на Фејсбук, Камбери објави дека поднел официјален предлог за создавање посебна истражна комисија, која би се занимавала со случаите на смртта на 135 албански војници кои служеле во Југословенската народна армија (ЈНА) во текот на 1980-тите.
„Многу од овие случаи се регистрирани како „самоубиства“, „несреќи“ или „дисциплински прекршоци“, но семејствата на жртвите изразија сериозни сомневања, пријавувајќи знаци на насилство на телата на починатите“, нагласи Камбери, пренесе Ора инфо.
АЛБАНИЈА
Јава њуз: Родова еднаквост- нема веќе маж/жена, новиот закон го отвора патот за ЛГБТ агендата во Албанија
Во име на родовата еднаквост, Албанија се соочува со промена што за многумина означува опасна пресвртница за традиционалната структура на општеството.
Новиот предлог-закон „За родова еднаквост“, претставен како чекор кон усогласување со европските стандарди, всушност е обвинет дека е отворена врата за воведување на концептот на трет пол и спроведување на ЛГБТ агендата во нашата земја, пишува Јава њуз.
Законот, кој досега ја признаваше еднаквоста како однос меѓу мажите и жените, сега ја проширува дефиницијата со воведување поими како што се инклузивен пол, родов идентитет, сексуална ориентација и родово изразување. Ова значи дека јасната поделба меѓу мажот и жената е доведена во прашање од нова рамка која се стреми да ги легитимизира другите полови надвор од овие две категории. Поддржувачите на законот го претставуваат како еманципација, додека критичарите го гледаат како чекор што удира во коренот на културниот и моралниот идентитет на нацијата.
КОЛУМНА
Коха: „Тенка линија во надградениот Устав“
„Како документ на надградби, Уставот има интегрирано решенија на мултиетнички државни модели, како што е обврската од времето на Уставната рамка на УНМИК, дека Владата нужно мора да вклучува претставници на немнозинските заедници – решение кое не би го поминало тестот за недискриминација на Европскиот суд за човекови права.
Но, од позитивна страна, Уставот има елементи на „мултиетничка држава“ во, на пример, изборот на заменик-претседатели на Собранието, заштитените идентитетски права со двојниот клуч на Бадентер или со асиметрични општински овластувања. Сите овие се елементи на „консоцијалната држава“ и ова на никаков начин не ѝ штети на државата. Напротив, попроактивното претставување на немнозинските заедници во државните институции е знак кон зајакнување на тие институции.“, пишува Авторот Ветон Сурои, во колумната „Тенка линија во надградениот Устав“, објавена во косовскиот дневник Коха.
Подготви: Д. Тахири
