Косовските медиуми се осврнуваат на долгите редици од двете страни на граничниот премин Блаце, што со месеци трае и е голем предизвик за патниците од двете држави.
Градоначалникот на косовскиот главен град Приштина, прогласи вонредна состојба поради лошото менаџирање со отпадот низ градот.
Во Албанија, според официјалните бројки на Централната изборна комисија, бројот на запишани странски гласачи достигна 117.096, додека до денеска до 11:20 часот одобрени се 71.945 барања.
Во продолжение се поместени сите содржини од редакцискиот избор на ЦИВИЛ Медиа, од албанските медиуми во регионот, за денешното издание на АЛ-Прес.
КОСОВО
Газета Експрес: Блаце, границата која ги малтретира Албанците од Македонија и Косово
Иако другите граници се испразнети од долги колони патници по враќањето на иселениците од зимскиот одмор, Блаце останува постојан предизвик за граѓаните на Северна Македонија и Косово.
Повеќе од 7 месеци се соочуваат со постојано малтретирање на овој граничен пункт, соочени со долго чекање и неприфатливи услови.
Оваа состојба предизвика голема вознемиреност и го влоши искуството на граѓаните кои ја минуваат оваа граница. И покрај овие тековни проблеми, надлежните органи, меѓу кои и заменик министерот Астрит Исени, продолжуваат да молчат.
Досега, не е даден официјален одговор за решавање на оваа ситуација, пишува косовскиот медиум Газета Експрес.
Зери: Засилени предизборни активности на политичките партии
Како што се наближуваат зборите на 9 февруари, политичките партии продолжуваат со активности за предизборната кампања.
Кандидатот за премиер од редовите на ЛДК, Лумир Абдиџику денеска го започнува денот со изборен митинг во Липјан, продолжувајќи со средби со жителите на трите села Штиме, во Војноц, Музеќине и Рашница.
Движењето Ветевендосје денеска ќе одржи изборен митинг во Гњилане, коалицијата за победничко Косово одржува митинзи во Дренас и Призрен.
ААК со коалиционите партнери ќе одржи и други собири во селата, градските населби и месните заедници, пренесе Зери.
ТВ 21: Приштина прогласи вонредна состојба за управување со отпадот
Градоначалникот на Приштина Перпарим Рама и директорот на јавните служби Беким Брестовци денеска ја соопштија вонредната состојба со управувањето со отпадот во главниот град.
Рама, на прес конференција рече дека состојбата во управувањето со отпадот во главниот град се влошува.
„Одлуката за прогласување вонредна состојба се заснова на резултатите постигнати во текот на 2024 година по преземањето вонредни мерки за подобрување на управувањето со отпадот. Еден од главните чекори беше вклучувањето на економските оператори во централното подрачје и снабдувањето на локациите со нови контејнери, што влијаеше на зголемување на квалитетот на услугите и создавање почиста средина за граѓаните.“, рече меѓу другото градоначалникот на Приштина, пренесе ТВ 21.
Репортери: Градоначалникот на Зубин Поток добил закани преку социјалните мрежи
На градоначалникот на Зубин Поток, Измир Зеќири, по четврти пат преку социјалните мрежи му се заканува исто лице.
Во врска со ова, Зеќири се огласи преку објава на Фејсбук.
„По четврти пат ми се заканува преку социјалните мрежи од истиот криминалец. Оваа кукавица на МУП на Србија ми се заканува со убиство и ги навредува Хероите и историските личности на албанскиот народ, вели Зеќири, пренесе Репортери.
АЛБАНИЈА
Ора Њуз: Гласање од странство, над 117 илјади регистрирани, одобрени 71 945 барања
Албанските гласачи кои живеат во странство, годинава првпат имаат можност да учествуваат со гласање на парламентарните избори на 11 мај.
Процесот за пријавување во Електронската платформа за гласање (ЕПИ) започна на 11 јануари и ќе трае до 4 март.
Според официјалните бројки на Централната изборна комисија, бројот на запишани странски гласачи достигна 117.096, додека до денеска до 11:20 часот одобрени се 71.945 барања, пренесе Ора Њуз.
КОЛУМНА
Коха: „Сите имаат поважна работа од дијалогот“
Соренсен ја презема задачата да го олесни дијалогот кога овој процес е во многу понеизвесна состојба отколку кога Лајчак ја презеде оваа функција пред пет години. Сите „засегнати страни“ (Stakeholders) во дијалогот имаат поважна работа од дијалогот.
Затоа, очекувањата не се толку големи. На Косово му претстојат избори и после нив ќе има тежок процес на формирање Влада. Србија се соочува со драматични случувања, кои за првпат ја разнишаа моќта на претседателот Вучиќ и покрај силната поддршка што ја има од ЕУ и САД“, пишува Авторот Аугустин Палокај во колумната „Сите имаат поважна работа од дијалогот“, објавена во косовскиот дневник „Коха“.
Подготви: Д. Тахири
