По осумнаесетти пат по ред, пратениците на косовското собрание во понеделник не успеаја да го конституираат деветтиот парламентарен состав, пишуваат косовските медиуми.
Во Албанија, Министерот за правда Улси Мања денес во Канцеларијата на Генералното обвинителство ги презентираше препораките на Советот на министри во борбата против криминалот.
Во продолжение се поместени содржините од денешниот редакциски избор на ЦивилМедиа, од албанските медиуми во регионот.
КОСОВО
Ора њуз: Ништо ново во Косово- седницата за конституирање на Собранието не успеа ниту по 18-ти пат
По осумнаесетти пат по ред, пратениците на косовското собрание во понеделник не успеаја да го конституираат деветтиот парламентарен состав, што е резултат на изборите во февруари, пренесе Ора њуз.
Пратениците десетти пат по ред одбија да формираат комисија која ќе го надгледува тајното гласање за новиот шеф на законодавното тело.
Прашањето за тајно гласање – кое беше предложено на 1 мај од страна на претседателот на седницата, Авни Дехари, откако кандидатката на Движењето Ветевендосје (ЛВВ) за претседател на Собранието, Албулена Хаџиу, не успеа на неколку гласања да ги добие потребните 61 глас за да биде потврдена на функцијата – е испратено до Уставниот суд на Косово од партиите што беа во опозиција во претходниот законодавен состав.
Газета експрес: Неконституирање на Собранието со последици за локалната економија
Светската банка веќе предупреди за забавување на економскиот развој во Косово оваа година. Се очекува ситуацијата, според експертите од областа, дополнително да се влоши поради политичкиот застој во земјата, пишува Газета експрес.
Ова е затоа што многу меѓународни финансиски договори останаа неодобрени за време на претходниот законодавен состав. Меѓу нив е договорот за финансирање со Меѓународното здружение за развој, како и договорот за кредит со Европската инвестициска банка за проекти во КЕК.
АЛБАНИЈА
Топ шќип: Владата со осум препораки до Обвинителството за борба против криминалот
Министерот за правда Улси Мања денес во Канцеларијата на Генералното обвинителство ги презентираше препораките на Советот на министри во борбата против криминалот.
Во својот говор, Мања нагласи дека препораките се структурирани во осум главни области.
„Првата област“, нагласи Мања, „е почитувањето на човековите права што треба да биде во центарот на работата на Обвинителството. Почитување на презумпцијата на невиност, избегнување на неоправдани одложувања во истрагите. Владеењето на правото започнува од правилна и непристрасна истрага.“
„Втората област е зајакнување на борбата против криминалот. Меѓународната соработка во борбата против наркотиците и организираниот криминал мора да се зајакне“, рече министерот.
Мања, исто така, ја нагласува важноста од создавање специјализирана единица за борба против сајбер криминалот.
Мања понатаму додаде дека „третата област е интегритетот, транспарентноста и одговорноста“.
„Канцеларијата на генералниот обвинител мора да ја зајакне контролата и одговорноста надвор од процесот на проверка“, рече Мања.
Четвртата област, според Мања, има врска со „ефикасност и градење на институционални капацитети“.
„Во врска со овој столб, поддршката што треба да ја обезбеди владата, исто така, треба да има суштинска улога. Се предлага употреба на современи методи на истрага, употреба на вештачка интелигенција. Интензивирање на проактивните методи на истрага“, рече Мања.
Според Мања, „петтата област е соработката со Министерството за правда“.
„Министерството за правда е подготвено тесно да соработува во изготвувањето на кривичните политики“, рече тој.
Мања додаде дека „нашата цел е заеднички механизам за следење на напредокот во борбата против криминалот“.
Шестата област е „соработка во врска со меѓународната правна помош, но и подобрување и размена на статистички податоци“.
Седмата област, додаде Мања, е „меѓуинституционална соработка“.
„Во тек е изградба на стратегија помеѓу СПАК, Генералното обвинителство и Министерството за правда“, рече министерот Мања.
Во врска со осмата област, Мања рече дека „меѓународната соработка и учеството во активни структури како што е Евроџаст се од суштинско значење во борбата против прекуграничниот криминал“.
Според министерот за правда, „препораките се конкретни, мерливи и спроведливи“, пренесе Топ шќип.
Клан: На 1 јуни започнува спроведувањето на пензискиот договор со Италија
Спроведувањето на пензискиот договор со Италија започнува на 1 јуни.
Веста ја сподели на социјалните мрежи премиерот Рама, кој информираше дека премиерката Мелони, која ја смета за сестра, му го донела финалниот документ од правниот процес за спроведување на пензискиот договор со Италија за време на нејзината посета на Тирана, каде што учествуваше на самитот на Европската политичка заедница, пренесе Клан.
Договорот со Италија, кој стапи на сила во март, ги гарантира пензиските права на околу половина милион Албанци и 4.000 Италијанци. Според документот, речиси 20 проценти од луѓето на возраст од 67 години кои досега не добиле пензија ќе можат да имаат приход до 400 евра месечно.
КОЛУМНА
Коха: „Самитот во Тирана и проширувањето на ЕУ“
„Самитот на Европската политичка заедница што се одржа во Тирана нема никаква врска со проширувањето на ЕУ. Оваа иницијатива беше преземена токму за да се излезе од формалниот и бирократски плик на ЕУ. Иако често се вели дека „нема алтернатива на ЕУ“, оваа иницијатива може да стане таква.
Но, за Албанија тоа беше извонреден успех во време кога го користи создадениот моментум за да постигне напредок во процесот на преговори. На 22 мај, Албанија формално ќе ја надмине Србија по бројот на отворени поглавја, правејќи повеќе за седум месеци отколку во последните десет години.“, пишува Авторот Аугустин Палокај, во колумната „Самитот во Тирана и проширувањето на ЕУ“, објавена во косовскиот дневник Коха.
Подготви: Д. Тахири
