„Европската унија сака да инвестира во следните години околу милијарда евра во државите од Западен Балкан“, изјави европскиот комесар за проширување Јоханес Хан, на бизнис форумот, во рамките на Четвртиот Самит за Западен Балкан во Трст. Тој потенцираше дека ЕУ ќе ги поттикне реформите, за регионот продолжи да се развива и земјите да го постигнат посакуваното ниво на економски развој.
Во интервју за „Дојче веле“, комесарот Хан нагласи дека целта е подобро поврзување со Европската унија.
„Ќе склучиме низа проекти на подрачјето на транспортот, односно енергијата, во вкупна вредност од околу 200 милиони евра што на крајот ќе активира вкупни инвестиции од околу 540 милиони евра. Посебно важно е дека ќе создадеме претпоставки за ново регионално економско подрачје што треба да ја поттикне трговијата во регионот, која не е најдобро развиена, но има потенцијал“, изјави Хан.
Според Хан, иако тоа се добри вести, ажурното спроведување на договореното е проблем кога се работи за Западен Балкан.
На самитот присуствуваше и Кочо Анѓушев, вицепремиер задолжен за економски прашања, кој потенцираше дека Владата на Република Македонија ќе работи на развивање на добра соработка со соседите, а истовремено, силно ќе се посвети на спроведување на потребните реформи што го трасираат патот на земјата кон членството во ЕУ.
„Од Трст испраќам порака и покана до сите странски инвеститори дека се добродојдени во Република Македонија. Ние мора да направиме сè за да обезбедиме рамка за привлекување инвестиции. Инвеститорите ќе имаат потполна поддршка од институциите во административните процедури. Како Влада ќе го поддржиме секој инвеститор и гарантираме безбедност на нивниот капитал“, нагласи Анѓушев.
На бизнис форумот се обратија и Анџелино Алфано, министер за надворешни работи и меѓународна соработка на Италија, како и министрите задолжени за економија, индустрија и енергетика од земјите на Западен Балкан.
Претставникот на земјата-домаќин на самитот, министерот Алфано, во своето обраќање потенцираше дека отвореноста и транспарентноста на државните органи кон бизнис секторот се клучни за повисока динамика на економијата, а дека вистински предизвик е креирањето на нови работни места за младите луѓе, во кои е иднината на секоја земја.
Самитот за Западен Балкан во Трст е дел од активностите што се одвиваат во рамките на „Берлинскиот процес“, иницијатива на Европската унија, чија цел е забрзување на процесот на интеграција на земјите од Западен Балкан во Унијата.
Дехран Муратов
