Благодарение на онаа мала елитна единица такозвана „гоцева стража“ се одбранети македонскиот идентитет, јазик, писмо, македонската народна песна, народна носија, македонското сирење, домашната ракија и македонското кафе.
Денес се одбележува точно два месеца откако „гоцевата стража“ херојски со жив штит го одбранија гробот на нашиот револуционер Гоце Делчев, а со тоа е спречено преку ноќ да исчезне македонскиот народ.
„Отако ни јавија од горе дека ќе дојдат бугарски државјани да го окупираат гробот на Гоце Делчев и да ни го земат идентитетот, ние неколкумината командоси како што седевме во кафана веднаш станавме од маса, и се упативме пред гробот на Делчев, не си го ни допивме ракијчето. Таму нè дочекаа неколку камери и свечено дадовме изјава. Откако си заминаа камерите си заминавме и ние, ама ова нека остане меѓу нас“, вели за ОЗБИЛНО нашиот анонимен командос од „гоцевата раса (стража)“.
Гоцевите стражари велат дека беа слабо „наоружани“ со греана ракија, салата и сирење и други реквизити и дека беше тешко да се издржи таа ладна февруарска ноќ.
„Поголем дел од „борците“ дезертираа и ја напуштија борбената линија, но среќа што никој не го документирал тој момент, па останува митот дека ние ја спасивме нацијата од исчезнување, ха-ха-ха“, вели командосот.
На прашањето – од кога постојат и на колку акции учествуваа, командосот вели дека не би сакал да открива повеќе детали, но додаде дека тие функционираат на дугме, односно се активираат кога треба да се дестабилизира државата, да внесат паника, страв, несигурност во институциите итн.
Тој вели дека командосите на „гоцевата стража“ се маскирани во обични луѓе, дел од нив се студенти, пензионери, адвокати, новинари, љубители на животни, екологисти, спортисти, политичари, музичари, аналитичари, но кога се работи за каузата веднаш ја облекуваат патриотската униформа и се упатуваат на браникот.
Дали тоа го прават про-боно или за кеш, командосот реши да одговори со гласен молк.
Како и да е сепак треба да им се заблагодариме на „гоцевите стражари“, бидејќи да не беа тие, денеска ние немаше да постоиме и да ја пишуваме оваа козерија.
Командант Че Ве Бара
Оградување, одбрана и заштита: Ова е козерија. Секоја сличност на овој текст со реалноста е (не)намерна.
