„Пред две години, Русија ја започна својата брутална агресија против Украина. И јас силно ја осудувам Русија за продолжување на агресијата и непријателствата. Сакам да изразам солидарност и најдлабоко сочувство со украинските пријатели и колеги, присетувајќи се на моите лични искуства во Украина, особено во почетната фаза на агресијата, кога деноноќно ја слушав сирената за воздушни напади и ја поддржував евакуацијата на јапонски граѓани во соседните земји, сред услови на паника.“, порача јапонскиот амбасадор Н.Е. Оцука Казуја на конференцијата „Украина – две години хероизам“.
„Најостро ја осудуваме руската агресија врз Украина. Не може да се оправда ова бесрамно кршење на меѓународното право, вклучително и Повелбата на ОН. Мора да се почитуваат суверенитетот и територијалниот интегритет на Украина. Ова не е само европско прашање, ниту само прашање помеѓу т.н. „Русија и Запад“. Секој насилен обид за еднострана промена на статус кво-то, не смее да се толерира никаде во светот.
Многу цивили се повредени или ги загубија животите. А руските напади врз болници, училишта, електрани и друга клучна инфраструктура, не само што ги уништуваат сегашните животи на украинскиот народ, туку ја загрозуваат и нивната иднина. Меѓународното право мора да се почитува, вклучително и меѓународното хуманитарно право. Мора да одговараат сите сторители на ова злосторство.
Набавката на Русија, на балистички ракети, од Северна Кореја и нивната употреба против Украина е апсолутно неприфатлива. Секој трансфер на оружје или поврзана опрема и технологија, меѓу Русија и Северна Кореја, е јасно кршење на релевантните резолуции на Советот за безбедност. Исто така, длабоко сме загрижени за секој можен трансфер на технологија поврзана со нуклеарни и балистички ракети во Северна Кореја.
Руската закана за употреба на нуклеарно оружје е сериозна и неприфатлива закана за мирот и безбедноста на меѓународната заедница.
Ги почитуваме напорите на многу земји да бараат мир. Меѓутоа, несоодветно е да се изедначуваат агресорот и жртвата, како и да се бара вложување на дипломатски напори од двете страни, небаре двете страни се виновни.
Јапонија постојано нагласува дека мирот мора да се заснова на целите и принципите на Повелбата на ОН. Во овој поглед, Јапонија ги поддржува напорите на претседателот Зеленски за неговата формула за мир. Мора да постигнеме сеопфатен, праведен и траен мир во Украина.
На народот на Украина им е потребна и визија исполнета со надеж за својата иднина. Кога премиерот Кишида ја посети Украина, како претседавач со Г7, во март минатата година, претседателот Зеленски ги истакна своите силни очекувања за Јапонија да го сподели искуствотото, нејзината технологија, како и приватни инвестиции од нашата земја за долгорочна обнова на Украина.
Пред само една недела, Јапонија го покани премиерот Шмигал заедно со украински компании во Јапонија и се одржа јапонско-украинска конференција за промоција на економски раст и обнова. Постигнати се опипливи резултати, вклучително и потпишување на над 50 документи за соработка.
Сакаме да истакнеме дека за време на конференцијата одржавме и седница на тема „Жени, мир и безбедност (WPS – Women, Peace and Security)“ во контекст на процесот на закрепнување и обнова во Украина.
На почетокот на седницата, осврнувајќи се на нејзината посета на Украина во јануари годинава, министерката за надворешни работи Камикава ја нагласи потребата од „реинтеграција“ на семејствата, заедниците и на сите граѓани во Украина и го претстави пристапот на Јапонија кон таквата „реинтеграција“, како и нејзините напори поврзани со WPS во поддршката на Украина.
Министерката Камикава понатаму изјави дека ја посетила Буча за да ги види со свои очи живите лузни од руската агресија и директно да слушне за нив од луѓето на теренот. Таа изјави дека мора да работиме на заштита на жените и децата кои се особено ранливи во војна и да обезбедиме „човечко достоинство“. Таа, исто така, ја изрази својата искрена почит за храброста и истрајноста на украинскиот народ, кој долго време стои обединет против руската агресија.
Сепак, овие иницијативи нема целосно да се материјализираат и да донесат доволнo корист за украинскиот народ, доколку Русија не ја запре својата агресија.
Уште еднаш силно ја повикуваме Русија да престане со својата агресија, веднаш и безусловно да се повлече од сите меѓународно признати територии на Украина.
Ова е прашање на принцип. Тоа е поголемо од политиката. Затоа, Јапонија со своите сојузници и партнери ќе продолжи да ја поддржува Украина онолку време колку што е потребно. Слава Украини!“, порача амбасадорот Казуја.
Д. Т.
Камера: Атанас Петровски
Монтажа: Ариан Мехмети
Фотографија: Биљана Јордановска
