В недела, 30 септември, одлучуваме за нашата и иднината на нашите деца. Имаме историска шанса да ги реализираме нашите стратегиски интереси, влез во Европската Унија и во НАТО, истакна генералниот секретар на СДСМ, Александар Кирацовски, при денешната посета на Вевчани.
Потсетувајќи на придобивките од евроатлантската интеграција на земјата, тој ги повика вевчанци да излезат масовно и да гласаат „за“ европска Македонија.
– Никој нема право да ја бојкотира нашата иднина и иднината на идните генерации. Свесен бојкот е свесно попречување на европскиот пат по кој сите ние патуваме повеќе од 25 години. Бојкотот е неодговорно опструирање и искривување на судбината на мнозинството граѓани, кои овој историски референдум го чекаа со децении. Вакво неодговорно однесување не смее и нема да се земе предвид. Затоа секој треба да излезе да гласа и со тоа да одлучи за иднината на Македонија. Одлучува само оној што во вистинско време излегува на местото каде што се донесува одлуката, само со излегување и со гласање може да се влијае на одлуката, нагласи Кирацовски.
Навраќајќи се на договорот со Грција, подвлече дека тој е гаранција за влез на Македонија во ЕУ и во НАТО, но истовремено го потврдува и нашиот македонски идентитет.
– Ние сме Mакедонци и секогаш ќе бидеме Mакедонци. Нашиот македонски идентитет и јазик, нашите граници, знаме и химна засекогаш ќе бидат признаени и заштитени од целиот свет. Со прифаќањето на договорот го расчистуваме патот до ЕУ и до НАТО и го зајакнуваме македонскиот идентитет, изјави Кирацовски.
Генералниот секретар на СДСМ оцени дека кај вевчанци се гледа расположение за масовна излезност, посочувајќи дека помалите општини и руралните средини ќе добијат повеќе средства од ЕУ-фондовите, со цел да се усогласат условите со европските или со поголемите градови.
По средбата со граѓаните на Вевчани, Кирацовски денеска ќе има средби и со жителите на Преспа, каде што ќе ги пренесе придобивките од членството на Македонија во ЕУ и во НАТО и ќе ги повика преспанци да излезат в недела и да го дадат свој глас „за“ европска Македонија.
