Во енклавата Источна Гута и околу градот Африн во Сирија денеска продолжуваат жестоките судири, во момент кога се навршуваат седум години од почетокот на сирискиот конфликт.
Конфликтот почна на 15 март 2011 година во екот на „арапската пролет“ со продемократски протести и репресии против нив од страна на властите во Дамаск. Постепено тој се претвори во војна во која загинаа повеќе од 350.000 луѓе. Со годините конфликтот стана посложен и во него се вмешаа и странски сили.
Сириската армија синоќа успеа да влезе во клучниот град во енклавата Источна Гута, кој е последен бастион на бунтовниците во близина на Дамаск и кој повеќе од три недели е цел на интензивни бомбардирања. Силите на сириските власти го нападнаа градот Хамурија и успеаа да преземат делумна контрола врз него. Градот се наоѓа во источниот дел на Источна Гута.
Како резултат на офанзивата на провладините сили, поддржани од Русија, која почна на 18 февруари, Источна Гута е поделена на три дела. Секој од нив е под контрола на различни бунтовнички групи.
Во бомбардирањата на Источна Гута од почетокот на офанзивата, па до сега загинаа над 1.220 цивили, меѓу кои 250 деца. Повредени се повеќе од 4600 лица. Само вчера беа убиени најмалку 31 цивил.
Од енклавата вчера беа евакуирани десетици цивили додека предходниот ден реонот го напуштија 150 лица.
Во северозанапдна Сирија турската армија и сириски бунтовнички групи кои ја имаат поддршката на Анкара, речиси целосно го опколија градот Африн, кој е цел на офанзивата на Амријата на Турција што почна на 20 јануари против упориштето на курдските Сили за заштита на народот.
Анкара ги смета Силите за заштита на народот за терористичка група но тие се сојузници на западните земји, пред се САД, во борбата против џихадистите во Сирија. Градот Африн има околу 350.000 жители и многу од нив се обидуваат да избегаат од него, затоа што таму повеќе нема вода и струја, а недостасуваат и храна и лекови.
Единствениот излез од Африн постојано е под артилериски оган и таму вчера загинаа десетмина припадници на милитантна група што ја поддржува Владата во Дамаск. Во бомбардирања врз градот вчера загинаа најмалку десет лица, меѓу кои и четири деца, а 34 луѓе беа повредени.
Во седмата година од војната во Сирија сепак дојде до уништување на џихадистите од групата Исламска држава, која својот подем го доживеа во 2014 година кога презеде контрола врз големи територии во Сирија но и во соседен Ирак.
Организацијата беше уништена во Ирак, а на сириска територија е присутна уште само во неколку помали области. Градот Рака кој де факто беше главен град на т.н. Исламски Калифар, што го прогласи ИД, минатиот октомври беше преземен од страна на Сириските демократски сили, сојуз во кој се обединети курдски и арапски борци поддржани од Вашингтон.
Крајот на битката против џихадистите од ИД и на меѓународните и на регионалните сили сега им овизможува да се фокусираат на проширувањето на своите сфери на влијание во Сирија.
Експертот за Сирија од Универзитетот во американската држава Оклахома, Џошуа Ландис смета дека во следниот период главна тенденција би можеле да бидат обидите за поделба на земјата.
Во североисточниот дел на Сирија се наоѓаат полуавтономни курдски области и се распоредени американски војници. Во северозападниот дел на Сирија, Анкара ги поддржува бунтовниците во провинциите Идлиб и Алепо и заедно со некои од нив спроведува офанзива против курдската еклава Африн.
Експертот од Центарот за нова американска безбедност во Вашингтон, Николас Херас оценува дека ваквото турско и американско влијание на теренот во Сирија ќе продолжи да зајакнува во иднина.
Сепак, сето тоа не им пречи на сириските власти да се стремат да ја повратат контролата врз целата земја. Првично сериозно ослабени, властите во Дамаск ги променија работите во своја корист благодарение на руската воена поддршка. Тие веќе повратија контрола над повеќе од половина од земјата и ги зголемија победите над бунтовниците и џихадистите.
Кон крајот на 2016 година целосното преземање на Алепо, вториот по големина град во Сирија и поранешен главен град на земјата, беше „момент на враќање“ за Дамаск.
Фактот дека Асад ја поврати контролата над Алепо и дека го контролира Дамаск ги поттикнува луѓето да велат дека револуцијата завршила и дека властите победиле во конфликтот.
Според францускиот експерт за Сирија, Фабрис Баланш од Институтот „Хувер“ на Универзитетот Станфорд, на психолошки план тоа има големо влијание.
[divide]
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
