Претседателот на Собранието на Република Северна Македонија, Талат Џафери, го прими Предлогот за пристапување кон измена на Уставот на Република Северна Македонија со насоки за изменување и дополнување на Уставот на Република Северна Македонија, чиј предлагач е Владата и тој е веднаш доставен до пратениците и со оваа постапка почнуваат да течат временските рокови предвидени со Уставот и Деловникот на Собранието.
Премиерот Ковачевски очекува дека околу уставните измени ќе има плодна дискусија, конструктивна расправа и оти ќе има натпартиски консензус за продолжување на европската интеграција на државата.
-Владата вчера информираше преку соопштение и преку објавување на интегралниот текст на предлог иницијатива за уставни амандмани дека одлуката едногласно е донесена и доставена вчера до Собранието. Собранието согласно своите процедури ќе ја организира прво работата на Уставната комисија, потоа и на пленарна седница. Сега од нас зависи, од одлуките коишто ние ги носиме, како и на кој начин и колку брзо ќе го продолжиме и завршиме патот на европската интеграција, рече Ковачевски.
Премиерот истакна дека се работи за уставни измени кои што, како што рече, не задираат во ниту едно идентитетско прашање.
„Ние сме мултиетничко мултипрофесионално општество кое што е пример за Европа во мало. И сметам дека нашите 120 пратеници на број во Собранието ќе имаат и визија, ќе имаат и доблест и храброст да донесат одлука која што ќе значи европска интеграција на државата и пред се обезбедување на подобра европска иднина за сегашните и за идните генерации“, потенцира Ковачевски.
Од друга страна пак, претседателот на опозициската ВМРО-ДПМНЕ, Христијан Мицкоски изјави дека уставни измени вакви какви што се и под бугарски диктат и на начин како се доставуваат до Парламентот, не само што не се прифатливи туку Владата дополнително го усложнува процесот со тоа што дефинирала текст на уставни измени што не само што е неприфатлив туку е тотално неразумен.
Предлогот, според Мицкоски дополнително ги загрозува позициите на Македонија во рамките на напредокот кон ЕУ.
Лидерот на опозицијата не сакаше да ја коментира денешната изјава на премиерот Ковачевски велејќи дека Владата во изминатиов период потпишуваала договори коишто не биле општествено искординирани односно поддржани и усогласени.
-Мислеа дека на тој начин коленичејќи пред меѓународната заедница ќе останат ден два повеќе на власт. Е сега дојде проблемот, сега не можат да испорачаат затоа што немаат кредибилитет како Влада, народот не им верува а главната опозициона партија беше комплетно исфрлена од овој процес. И сега што направија, потпишаа нешто коешто немаше ниту општествен, ниту политилки консензус и сега тоа нешто не можат да го испорачаат и создаваат дополнителен проблем во евроинтегративниот процес на Македонија, изјави Мицкоски.
Д. В
