Естонија е една од нашите најпријателски држави особено во делот на поддршката за проширување на ЕУ со нови земји членки. Разговаравме за билатерални, но и за мултилатерални прашања бидејќи со Естонија сме држави кои се членки на НАТО, изјави премиерот Димитар Ковачевски од Талин по средбата со неговата естонска колешка Каја Калас.
Тој додаде дека со естонската премиерка разговарале за поддршката која двете земји ја даваат на Украина во нејзината борба за демократија и територијален интегритет.
Исто така, разговаравме во делот на соработката која ја имаме во делот на дигитализацијата на Северна Македонија во голем број на аспекти, со оглед на тоа што Естонија е една од најразвиените држави во делот на дигитализацијата. Секако дека тоа се однесува на голем број на проекти кои се водени кај нас, меѓутоа и оние кои ќе следуваат, особено воведувањето на електронска лична карта за граѓаните на Северна Македонија, проект кој е во моментов започнат преку акциски план во МВР и соодветни други институции во државата, истакна Ковачевски.
Премиерот, исто така, најави дека Северна Македонија е во фаза на пристапување кон Центарот за извонредност за кибер безбедност, кој е дел од НАТО и сместен во Естонија.
Многу наскоро ќе ја видиме и Северна Македонија, односно експертите од нашата држава коишто ќе бидат присутни во однос на унапредувањето на сајбер безбедноста на нашите институции, рече Ковачевски.
